Brazil khawpui Rio de Janeiro a inpeih - IOC

Hrileng, tualchhung buaina leh ei leh barah harasatna hrang hrang tawk mah se 2016 Summer Olympic thleng tur Brazil khawpui Rio de Janeiro chu infiamna khawmpui lian thleng tur hian a inpeih tawh thu International Olympic Com-mittee chuan an sawi chhuak.

IOC executive director Nawal El Moutawakel kaih-hruai Rio Olympic thleng tura Brazil an inbuatsaih ṭhat leh
ṭhat loh endiktu IOC group hian kum 2009 aṭang khan endik hna an lo thawk tawh a, August 5-21 chhunga neih tur Olympic inbuatsaihna a ṭhat tawk leh tawk loh an endikna hnuhnung berah chuan IOC group hruaitute an lungawi.

Brazil-ah hian hrileng pa-khat 'Zika' a darh nasa hle a, infiammi ṭhen khat chuan kal an hreh phah hial. Brazil's Sports Minister Leonardo Picciani chuan June thla khan Olympic atan an inpeih tawh thu sawi mah se sorkar lam sum indaih lohna leh politics thil avangin building sak tur ṭhenkhat tih khawtlai a ni a, hun tepter tawh takah pawh an buaina hi a la fel lo nia sawi a ni thung.

Mahse, IOC group hotupa El Moutawakel chuan Olympic thleng tur chungchang sawiin, "Inelna thleng turin an inpeih" tiin endikna hnuhnung ber an neih zawh hnuah a sawi a ni.

Harsatna a fel tawh?

Lawng inkar siak leh tui lama infiamna chi hrang hrang an tihna hmun tur pakhat Guanabara Bay chu mihring thli a luan luh nasat avangin a thianghlim tawk lo, tiin International Olympic Committee leh International Paralympic Committee (IPC) hnuaia lawngkar infiamna khaikhawmtu World Sailing (WS) chuan an lo sawisel tawh.

Lawngkar intihsiak 10 zinga pasarih an tihna tur hmun Marina de Gloria tui then thianghlim theihna tur chu nikum December thla khan an siam chauh a, duhthusama peihfel a la ni lo nia sawi a awm bawk. IOC chuan, "Tui bawlhhlawh paih fai nan hian pipe vuah a ni tawh a, tunah chuan tui hi a thianghlim tawh hle," an ti.

Hrileng mek Zika vang hian infiammi ṭhenkhat an kal hreh tih a chiang a, a bikin Golfer-ten an hlau zual niin a lang - World number 1 Jason Day, number 2 Dustin Johnson leh number 4 Rory McIlroy te an inhnuhdawh tawh hnuah num-ber 3 Jordan Spieth a inhnuk-dawk ve leh tawh a, International Golf Federation president Peter Dawson chuan Olympic-a Golf inelna a hlut loh pah a hlauh thu a lo sawi ve tawh bawk.

World Health Organisation (WHO) lam chuan hrileng hi a nep deuh tawh an beisei a, "Zika vang hian mimal emaw ram bik emaw a hranpaa khuahkhirh leh khap an awm dawn lo a, angkhat veka awmkhawm tur a ni ang. Olympic neih hun hi Brazil-ah chuan khawro lai leh vawh lai a nih avangin thosi a-
ṭanga kai theih natna hrik hi a darh nasat loh kan beisei," tiin thuchhuah an lo siam ve bawk.

Venhimna a ṭha tawk dawn em tih hi buaina pakhat a ni a, thla hmasa lawk khan police-te chuan hlawh an lak ṭhat loh vang leh venhimna kawnga an hnathawhnaah puihna an hmuh ṭhat loh avangin Galeao International Airport-ah lungawi lohna an lo lantir tawh - banner-ah ''Police leh kangṭhelh pawlten hlawh kan la lo" tiin an tarlang. An thusawi zinga sawi zui hlawh pakhat chu, "Rio de Janeiro-a rawn kal hi a him lo" tih a ni.

Amaherawhchu, IOC lam chuan an zirchian hnuah tunah chuan Olympic Park, Barra de Tijuca atan venhimna a ṭhat tawk tur thu an sawi a, "Ven-himna hnathawktu 85,000 zet chu infiamna neihna tur hmun Olympic Village atan an inpeih tawh," an ti.

Brazilian Olympic Com-mittee president Carlos Nuzman chuan, "Khawvel hmun hrang hranga infiammite leh anmahni kaihruaitu turte bakah Olympic thleng tura mipui lokal turte lo mikhual turin kan inpeih tawh. Rio khawpui han fan kual hian hmasawnna hmuh tur a tam a, rim taka hna thawh a nih huna kan inpeih thei hi a lawmawin kan inchhuang hle. Hun ropui tak kan tawng ngei ang," tiin a sawi ve bawk.