Ancelotti-a'n hna a ṭan ta

Thawhṭanni khan Carlo Ancelotti chuan Bayern Munich-ah hna a thawk ṭan ta a, season thar atan Sabener Strasse training ground-ah player te inbuatsaihna a neih pui.

A zawna vawi thum Bundesliga champion a nihpui hnuah Pep Guardiola chuan Bayern chhuahsanin Manchester City a pan a, Spanish coach hmunruak luahkhat tur hian Real Madrid boss hlui hi lakluh niin 1996-97 season-a league champion nih puitu Giovanni Tra-pattoni tih lohah chuan Italian manager zinga Bayern enkawl leh thei hmasa ber a ni.

Kum 57-a upa An-celotti chuan, "Bayern hian Bundesliga leh Champions League-ah hnuhma an nei ropui hle a, chhawmnun ka tum ang. Trapattoni ang khan sulhnu ṭha hnutchhiah ka tum ang," tiin a hnam puipa hna lo thawh tawh a dah sang thiam hle.

Thawhhona ṭha a pawimawh thu sawi zuiin, "Inelna zawng zawngah hlawhtlin kan duh dawn a, manager chuan coaching staff leh player-te puihna zarah ruahmanna ṭha a nei thei - hei hi hlawhtlinna tur bul a ni ang. Result ka hre lawk thei bik lo a, hrelawk thei ka nih chuan dawithiam ka ni tihna a ni ang, kei chu manager chauh ka ni," a ti.

Italian coach-in trai-ning a neih ni hmasa berah hian captain Philipp Lahm bakah senior player Arjen Robben, Franck Ribery leh Xabi Alonso te an inlan - Euro 2016 khel player te erawhin club training an la zawm lo thung.