Dimitri Payet man a tlawm dawn lo

West Ham co-chairman David Gold chuan Euro 2016-a khel ṭha tak an player Dimitri Payet chu pound maktaduai 50 aia hniama chhuahtir an tum loh thu a sawi.

Payet hian Premier League-a a season hmasa berah goal 12 khung nghalin a ṭhiante thun tur vawi 15 a siamsak a, Euro-ah a chet ṭhat zui bawk avangin Chelsea, Manchester City leh Paris Saint-Germain nen sawizawm nghal a ni.

Hammers co-chairman David Gold chuan, "Payet-a te ang player theihna sang tak nei hi chu eng club pawhin an duh a, pound maktaduai 50 hnuailam china dawrna chu a biak pawh kan be lo ang," a ti.

Gold chuan sawi chhunzawmin, "Payet hi kan tan a pawimawh em em a, amah behchhan hian kan team pawh din a ni - a awmzia takah chuan pound maktaduai 50 pawn min dawrtu awm se Payet hi hralh kan tum lo a, zawrh lai a ni lo," tiin chhuahtir a tum loh hmel hle.

Hammers hotupa chuan an player pawimawh chu chelh tuma theihtawp an chhuah thu sawiin, "Kan hnena Payet-a cham zel theih nan a hlim thei ang bera awmtir kan duh a, manager nen an inpawh em em bawk. London hi an chhungkuain nuam an ti em em a, stadium thar kan luah dawn bakah fan-ten an hmangaih em em a, kan theihna zawng zawng kan pe bawk - chu chu he hmuna Payet cham zel nan a tlin tawk ka beisei," tiin an player chhuanvawr tan theihtawp an chhuah thu a sawi.