Wayne Rooney-a'n Mourinho a fak

England captain Wayne Rooney chuan Jose Mourinho hnuaia thawh a châk tawh thu a sawi a, Manchester United manager thar chu a fak bawk.

Kum 30-a upa Rooney chuan, "Jose nena tun season-a kan thawk dun tur chu a phurawm tawh hle a ni. Khawvela manager ṭha ber zinga mi a nih avangin Manchester United boruak a nung ṭha hle. Amah hi mimal ang leh manager a nihna angin ka zah a, manager hlawhtling tak a nih bakah pa fel tak a ni bawk. Manager thar kan neih avangin ka danglam phah lo ka tih chuan dawt ka sawi tihna a ni a, manager thar mit tlung turin theihtawp ka chhuah dawn," tiin a phur tawh thu a sawi.

Mourinho fak chhun-zawmin Rooney chuan, "Mourinho enkawl team hi ka hmachhawn ve nual tawh a, inkhel awlsam a awm ngai lo. A team-te hi hneh an harsa a, an tihtur an chiang thei bawk a, a pawimawh ber chu hlawhltinna a ni. United-a a rawn ken luh tur zingah chuan a tawnhriat hi a pawi-mawh dawn," tiin a sawi.

August 3 khian Wayne Roo-ney-a testimonial match chu Manchester United leh Everton ten an khel dawn a, he inkhel hi Mourinho-a'n Old Trafford-a United a kaihhruaina hmasa ber tur a ni. Inkhel aṭang hian pound maktaduai 5 vel hmuhchhuah theih beisei a ni a, naupang harsa zawkte ṭanpuina tur atana Rooney pawl din hnenah hlan a ni ang.