Hull-in Robson-Kanu an duh

Euro 2016-a Wales leh Belgium an inhmachhawn ṭuma Cruyff Turn hmanga goal ropui khungtu Wales striker Hal Robson-Kanu chu Hull manager Steve Bruce chuan an hnena khel tura a duh thu a sawi.

Hull manager Bruce chuan, "Robson-Kanu be turin kan inbuatsaih a, kan hnena khel turin kan sawm dawn a ni. Hal hi kum naupang tak a la ni a, field sirah inkhel tam zawk mah se Wales tan a laiah a khel ṭha em em a, piantharna a chang ni berin ka hria," a ti.

Kum 27-a upa Kanu hian club-ah winger angin a hun tam zawk hmang mah se Wales manager Chris Coleman-a'n striker atan a chhawr a, Euro 2016-ah a hlawhtlinna kan hmu. Hull manager Bruce pawh hian Kanu hi a lalut thei a nih chuan striker anga chhawr a duh a ni.

England nena sawi-zawm hlawh mek Bruce chuan a striker rim lai chungchang hi sawi chhunzawmin, "Kanu hi player lian, chak, tharum ngah, che rang leh rin loh lama tlan dan thiam tak a ni a, amah duhtu tam tak an awm tih hre mah ila theihtawp kan chhuah ang," tiin Reading-in an chhuah zalen striker chu lakluh ngei a tumruh hle.