Rakesh aia sang Lalrina Tuikual South 60 - 73 Mission Veng

Ningani zan Samsung 3:16 Plan Solution Mizoram Super League inkhel hmuhnawm takah Mission Veng-in Lalrina Rentlei chet ṭhat hmang ṭangkaiin Tuikual South 73-60 in an hneh. Tuikhuahtlang tlangval Lalrina'n point 30 a khung.

First quarter aṭangin Lalrina a che ṭha a, Vikings-in bul an ṭan ṭha tihna a ni. Entu nei ṭha Tuikual South-in Rakesh-a kutah mawhphurhna an dah tam a, Vanchhuangpuia leh F. Zodinthara te'n an thlawp ṭha tawk lo. Halftime-ah 33-29 in Tuikual South in hma an hruai a, an inthlau lo hle.

Third quarter-ah Vikings an chung­nung leh hret a, fourth quarter-ah inkhel a hmuhnawm. Tuikual South-in C. Lalfakawma leh Chpa te chet ṭhat zarah Vikings an hnaih lehzual a, mahse Lalrina kut a kal a, three point a lut zel , Vanlalnunhlua Varte (Puipuia) a che ṭha bawk nen inkhel a tawp meuh chuan 73-60 in Vikings an chak.

Tuikual South BC coach KC Lallian­tluanga chuan, "Free throw kan hlah hnem lutuk kha kan chak lohna chhan chu a ni. Lut vek ilang chuan chakna chance chu a awmin ka hria. Tin, kan vanduai ve reng reng bawk. Vikings tan Lalrina a lut thei em em a, keini erawh kan lut lo chiah chiah zel. Tihsual kan nei tih chu ka pha lo a, mahse kan inthlauhna a tam lo," tiin an vanduai thu a sawi.

KC-a chuan sawi zelin, "Tuikual South bakah veng pawn aṭangin ṭawi­awmna kan dawng ṭha a, kan neih ṭhat ber ṭum anih hial ka ring. Final thlen theih kan la inbeisei a, theihtawp kan chhuah zel ang," tiin MSL-a champion hmasa ber an la nih theih thu a sawi.

Mission Veng Vikings coach Reuben Lalchhandama chuan, "MSL ṭan tirh aṭanga kan khelh ṭhat ber ṭum a ni a, kan zir ang thlapin kan khel chhuakin ka hria. Tuikual South luh theih loh chhan kha chu ka defence ṭhat vang a ni. Hun tawpah erawh kan talbuai leh ṭep a, mah se time out kan koh hnuah kan insiamrem thei a, chak phu zawk kan ni," tiin an khelh ṭhat thu a sawi.

Chda chuan sawi chhunzawmin, "Lalrina khan a theihna angin a khel a, kan player dangte pawhin khatiang khan an khel thei a ni. Tuna kan khelh anga kan chetṭhat zel theih chuan final thlen hi kan kutah a awm," a ti.