El Clasico vawi 170-na Camp Nou-ah Real an leng lut dawn

Pathianni zan khian Spain ram chu inkhel en vangin a chawl leh ṭhuap dawn a, zanlai dar 1:30 hian Camp Nou-ah Barcelona leh Real Madrid an inkhelh dawn vang a ni.

Spanish La Liga champion tur zawnna tur ang a ngaih a ni dawn. Table-a hmahruaitu Barca hian point 65 an hmu tawh a, an hnuai chiahah Real hi awm in, point khat chauh in an inthlau. Barca tan hmahruai fal theihna hun ṭha a nih rualin Real hi an chak anih chuan hmahruaitu an in thlak dawn a ni.

Champions League quarter final lut hlim ve ve an ni a, Real hian German club Schalke 04 hneh in Champions League last 16 an paltlang. Barca pawh in English champion Manchaster City hneh in quarter final an lut ve bawk. Inrintawkna an neih san lai ve ve a nih avang in chak zawk tur rin thiam a har hle.

Nou Camp-a inkhel tur ni mah se Real hia an zam lo ang, a chhan chu La Liga-ah an ni aia midang khelmual a goal khung thei an awm lo. Away game vawi 14 an khelh aṭangin goal 39 zet an khung thei. Barca khelmualah hian Ronaldo, Karim Benzema, Jese Rodriguez, Raphael Varane, Sami Khedira, Marcelo Vieira, Sergio Ramos te hian goal an khung vek tawh.

Tunge langsar ang?

Khawvel player ṭha rual awmkhawmna club an nih avangin a langsar ber tur a sawi theih loh. Tunlai khawvel a player langsar ber pahnih Lionel Messi leh Cristiano Ronaldo ten lansarh an inchuh dawn avangin an inkhel tur hi a nep thei lo.

Anni pahnih hi goal khung lo a awm thiam lo ve ve an ni. Barca superstar Messi hian tun season-ah a club tan match 40 a khelh tawh aṭangin goal 43 thun tawh in a ṭhian te thun tur vawi 21 zet a siamsak tawh bawk.

He tih rual hian Real Madrid star Ronaldo pawh a nep bik lo, tun season-ah a club tan match 39 khel tawh in goal 41 a khung tawh a, a ṭhian te thun tur vawi 16 a siamsak tawh bawk.

Team pahnih inkhel tur hi tlarhnung lam aiin tlarhma lam in ngaihven a hlawh ang. Neymar, Messi leh Luis Suarez te inkawp dan tum hi khawi club defender tan mah a chakawm loh ang.

Khawvel player man to ber Gareth Bale leh Ronaldo te inkawp hian Javier Mascherano leh Gerard Pique te tan hna hautak an siamsak leh ngei ang.

Eng nge an sawi?

Barca manager Luis Enrique chuan, "Kan boruak ṭhat zual lai a nih avangin kan zam lo. Kan point inthlauhna hi point khat chauh a nih avangin kan inkhel result hian thil a tidanglam thei.Fimkhur takin kan khel ang, inkhel tawp hunah hma kan hruai chhunzawm zel ka beisei," tiin finkhur takin a sawi.

Barca defender Pique chuan, "Kumin chhunga inkhel pawimawh ber a ni hial ang. Camp Nou-a inkhel tur kan nih avangin kan dinhmun a ṭha sa bik ngawt lo, 50:50 a ni. Point thum kan hmu thei a nih ngat chuan kan champion zui theih ka ring," tiin a sawi.

Real manager Carlo Ancelotti chuan, "Kan hmachhawn tur team hi keimahni ang tho a team ṭha an nih avangin kan fimkhur a ngai hle dawn. Ka player te ka ring tawk a, kan khelh ṭhat lai tak anih vang in tu team mah hi akn hlau lo a ni. Hmahruai theihna hun ṭha kan neih hi kan chhawr ṭangkai theih ngei ka beisei," tiin a sawi.