El Clasico

El Clasico khelh a nih lai chuan Spanish ram pumpui hi a chawl ṭhuap ṭhin tiin a sawi uar te chuan an sawi hial. Chutiang khawpa Spain mipui te ngaihven rawn inkhel hi Mizoram thlengin kan lo ngaihven a, a ropui zia hi phat rual a ni lo.

Tunhma chuan..

Real Madrid leh Barcelona inkhel, a hming a 'El Clasico' tia an vuah hi a tirah tak chuan La Liga bika an inkhel sawi nan an hmang ṭhin a, tun hnaiah team pahnih te eng competition-ah pawh an in tum dawn apiangin an hmang thung. Kumtin Champions League final tih lohah chuan football inkhel entu ngah ber a ni ziah a, March 2014-a an inkhel kha khawvel pumpuiah mi maktaduai 400 chuangin an thlir hial.

Team pahnih inkhelha an inhneh nasat ber ṭum in Real Madrid in 11-1 in Barcelona an hneh. June 13, 1943 khan Spanish team inhal ber pahnih hian Copa del Rey semi-final an khel a, Barcelona in Real hi an khan lo hle. He inkhela Barcelona chak loh nasat chhanah hian Catalan mipuite chuan Spanish Police te'n Barcelona player-te hi an vau niin an sawi a, tun thlengin a tih chianna erawh a la awm lo.

Team inhal chu

Real Madrid leh Barcelona hi Spain rama khawpui lian pahnih behchhana din an nih vanga in hal an ni. Real hi Spain khawpui Madrid behchhana din an nih laiin Barcelona erawh Spain aṭanga in dan duh Catalan huam chhung a mi niin Catalan mipui te'n an chhuan em em a ni.

Politics taka an inhalna hi khelmual chhungah an chhawm lut a ni ber.

Team pahnih hi tunhma aṭang tawha players inchuha lo buai tawh ṭhin an ni. Kum 1950 chho khan Real Madrid chanchina player ropui ber pawl Alfredo Di Stéfano chungchangah team pahnih an lo buai hrep tawh. FIFA in team pahnih tan inkhelh chhawk tura thu a rem hnuah hei hi duh lo in Barcelona an inhnukdawk a, Di Stefano-a'n Real Madrid a zawm. Hei hian team pahnih inkar boruak a chhem alh leh nasa zual hle.

Kum 2000 khan Barcelona player pawimawh Luis Figo chuan Real Madrid a zawm a, Camp Nou-a a kir leh hmasak berah Barca fan te'n an au el nasa hle. Amah tih el nan vawk lu te hial khewlmualah an vawm lut a ni.

Tuna Barcelona coach Luis Enrique hian Barcelona captain hial a nih hma in Real Madrid tan a lo khel tawh ṭhin bawk.

Hmelmakna karah pawh lawm hlawh player

Team inhal tak an nih avangin Real Madrid fans chuan Barcelona player-te an haw em em a, chutiang chiah chuan Barcelona fans pawn Real madrid player-te an haw thei hle.

Mahse, hetiang karah hian an thiam leh khelh hmuhnawm luat vanga club pahnih fan te'n an huat lem loh hi an awm ve nual tlat. Kum 1980 khan English Winger Laurie Cunningham chu a khelhna Real Madrid leh Barcelona an intum ṭumin a khelh ṭhat em avangin Camp Nou-ah Barcelona fan-te'n kut bengin an lawm a, field a chhuahsan dawnin fan-te chuan ding chungin zahna an lan tir hial. Real Madrid player zinga Camp Nou-a lawm hlawh hmasa ber a ni.

June 26 1983 khan Real Madrid leh Barcelona te'n Copa de la Liga final second leg Santiago Bernabeu-ah an khel a, football khawvela hming dai tawh ngai lo tur Diego Maradona chuan Real defender te duhtawka bum kualin ngeiawm takin goal a khung a, a chet vel dan avang hian Real fan-te chuan kut bengin an lawm!

Team pahnih inkara player lawm hlawh hnuhnung ber chu Ronaldinho kha a ni. November, 2005 khan Real Madird leh Barcelona an inkhel a, Brazilian player ropui hian Real defence mawi taka vawi hnih lai ṭhiatin goal hnih a khung a, 3-0 in Santiago Bernabéu-ah a team a chakpui a, real fan-te'n inkhelh zawhah ding chungin zahna an lan tir hial a ni.