Parma an khel tluan thei dawn

Italy court chuan Serie A club Parma chu sum lamah an tlachhia tih a puang a, season tawp thlenga khelh an phalsak thung.

Club pawisa bat zat hi pound mak­taduai 54 vela chhut a ni. Thla liam taa chairman thar Giampietro Manenti-a'n an ba neihte rulh zawh ngei intiam mah se Nilaini khan credit card chingpen thubuai vanga man a ni.

Italian league-in Parma hi season an khelh tluan theih nan pound maktaduai 3.6 an ruahman sak.

Parma season hi an player-te tan chuan a la rei dawn khawp mai. An tlak chhiat tawh avangin tun season-ah hlawh an la lo a, anmahni thawmhnaw an suk a ngai a, team bus an khalh a ngai a, inkhelh zawha intihfaina tur tui lum an nei lo bawk.

Parma hian tun season-ah neitu thar pahnih an nei tawh a, sum lama an chet buai avangin point thum paihsak an ni bawk.

Serie A club Parma hian sulhnu ṭha tak a nei a, AC Milan midfielder hlui Roberto Donadoni hnuaiah an khel mek. Kum 1997 khan Serie A-ah pahnihna an ni a, 1995 leh 1999 khan UEFA Cup-ah an champion a, 1993-ah UEFA Cup Winners' Cup-ah an champion bawk.