Europe-ah English an ṭawl Everton in goal an chhuah hnem

Nilaithawhṭanni zan khan Europe-a English club dam awm chhun Everton chu Ukraine-ah an chak lo a, Europa League aṭangin an tla. Tunkar vek khan Arsenal leh Manchester City te chu Champions League aṭangin an lo tla tawh bawk.

Europa last 16 First leg-a 2-1 a an hneh hnu Dynamo Kiev khel turin an zin chhuak a, khualmualah hian goal nga an chhuah a, goal hnih chauh an khung. Inkhel pahnih belh khawmah 6-4 in an chak lo.

Goodison Park-ah 2-1 a an chak tawh avangin beiseina sang tak nen Everton in Dynamo khelmual an pan. Amaherawhchu Everton in inkhel bula an ṭan ṭha tawk lo. Minute 21 na lekah Dynamo winger Andriy Yarmolenko chuan box pawn aṭangin mawi tak maiin a tlawh lut a, inkhel hmasa nen belh khawmin 2-2 chiah a ni.

Everton an insaimṭha nghal striker Romelu Lukaku chuan box pawn aṭang tho in mawi takin minute 29-naah a pet goal ve leh nghal. Mahse Lukaku goal hian Dynamo a chhaihkawlh chiang hle, Lukasz Teodorczyk 35'; Miguel Veloso37'; Oleg Gusev 56 ' leh Antunes 76' ten goal khat ṭheuh hmangin an chhang let zui. Minute 82-na a Phil Jagielka goal thun in awmzia a nei tawh lo.

Everton manager Roberto Martinez chuan, "Kan tlar hnung buai kha kan tuar a ni e. Goal khat kan khung tawh kha chuan kan dinhmun a ṭha hman hle a, mahse kan fimkhur loh vangin goal kan chhuah belh zel si. A pawi tak zet a ni. Kan tlarhnung chauh dem tur an ni lo a, kan zavaia mawhphurhna a ni," tiin a sawi.

Kiev manager Serhiy Rebrov chuan, "Zanina kan chakna hi Ukraine ram pumpui tan a ni. Ka player ten nuam ti takin an khel thei a, pressure kan insiam duh loh avangin kan tan a awlsam phah. Quarter final kan lut hi kan lawm a, a sang thei ang ber thlen kan tum ang," tiin a sawi.

Inkhel dang results

Dinamo Moscow 0-0 (agg 1-3) Napoli

Dynamo Kiev 5-2 (agg 6-4) Everton

Roma 0-3 (agg 1-4) Fiorentina

Ajax 2-1 (agg 2-2) Dnipro Dnipropetrovsk

Dnipro Dnipropetrovsk hi away goal rule hmangin an chak

Besiktas 1-3 (agg 2-5) Club Brugge

Inter Milan 1-2 (agg 2-5) VfL Wolfsburg

Sevilla 2-1 (agg 5-2) Villarreal

Torino 1-0 (agg 1-2) Zenit St P