Anfield-ah United an lenglut dawn

Pathianni zanah Manchester United in Liverpool an lenchilh dawn a, Premier League ngainatu te hmuh chak a ni.

Tunhma chuan Liverpool leh Manchester United inkhel hi champion inchuh inkhel a ni ṭhin a, kuminah erawh Champions League khelh phak inchuh inkhel a ni dawn. English club lian ber pahnih inkhel tur an nih avangin eng 'level' pawh nise he team pahnih inkhel tur hi a boruak a te thei lo.

Tunhnai dinhmun

Liverpool hian season ṭan tirah beisei phak lo mah se, kum 2015-ah erawh harh tharna an chang a, kumin chhungin Premier League-ah hneh loh an la tawng lo. Tunhnai an match khelh vawi rukah vawi nga hnehna an chang thei a, vawi khat an khingpui goal awm lo in an inhnehtawkpui.

Liverpool-in tun season Premier League-a an ngam loh hnuhnun ber erawh zanin a an khelh tur Man United niin December khan old Trafford-ah 3-0 in an tlawm.

Manchester United in season ṭan dawnah Dutch boss Luis Van Gaal an lalut a, khawvela players ṭha ber ber Angel Di Maria, Radamel Falcao leh players dang lalut in beiseina sang tak nen season an ṭan. Mahse, United in beisei an phak lo a, season ṭan dawna champion sawi ri khan Champions League khelh phak hram tumin an buai mek.

United hian an match hnuhnung vawi rukah vawi li hnehna changin vawi khat chak loh leh vawikhat draw result an nei. United in an hneh loh hnuhnun ber chu Liver­pool in an hneh hnuhnun ber Swansea City an ni a, 1-2 in khualmualah an hneh lo. Mahse, United hian an match hmuhnung berah Tottenham Hotspurs 3-0 in an hneh a, an phur vanglai tak a ni.

Gerrard-a game hnuhnung

Liverpool captain inhliam dam­kawr Steven Gerrard hi a inkhel thei a nih ngat chuan Manchetser United tan ven uluk a ngai ang. Season thara USA lama pem mai tur Gerrard hian Premier league-a Manchester Unuited a tum hnuhnung match 11-ah goal sarih a khung thei a, Liverpool players zinga United ngam ber a ni.

Pathianni a United nena an inkhel tur hi Gerrard a tan Anfield-a United a hmachhawn hnu­hnung ber tur a ni bawk. Liverpool fans leh palyer te'n Gerrard-a tan tal chak an duh ang. Liverpool captain ropui 'Captain Fantastic' ti a fan-te'n an koh hian United hi a haw khawp a, inkhelh zawhah Manchester United player tumah jersey ala inthleng pui lo! "Ka inah Man Utd jersey in hmu lo ang," tia sawitu a ni.

Manchester United hi Premier League club zingah Anfield-a Liverpool ngam ber an ni a, Liver­pool khelmualah hian vawi sawm chak tawhin Premier League club zingah an ni aia Anfield-a chak hnem an awm lo.

Tute nge khel dawn?

Liverpool tlar hma hi Premier League tlar hma hmuhnawm ber pawl an ni hial ang. Phillipe Coutinho, Raheem Sterling leh Daniel Sturridge te tlar hmaah an rawn inkawp lehin a rinawm a, an ni pathum inkawp lo dan hi Manchester United defender tan hna hautak a tling ang.

Liverpool match hnuhnung vawi thuma vawi thum goal khung thei Jordan Henderson hi a hmuhnawm lehin a rinawm a, tunhnaia Sou­thampton-a a khelh dan anga khel leh ṭan mek Adam Lallana hi ven uluk a ngai bawk ang. Mahse, United tlar hnung hi kar hmasa lawka Harry Kane dah bo thei kha an ni a, an ngaihtuahawm loh ang.

Manchester United tan captain Wayne Rooney hi an innghahna tur a ni leh dawn a, Liverpool defender tan Red Devils tana Premier League goal 169 khung tawhtu hi hna hautak siam tur khawpin a ṭha tawk. Midfiled-ah United tan Michael Carrick hi an innghahna a ni lehin a rinawm a, Spurs an khelh ṭumin Carrick tel a United hlauhawm zia kan hmu tawh.

Eng nge an sawi?

Liverpool manager Brendan Rodgers chuan, "Tun hnaiah kan khel ṭha a, a pawimawh ber chu match tina chak chhoh zel hi a ni. Panganaah kan awm mek a, season tawpah pahnihna kan nih theih ka beisei. Kan khelh ṭhat tluan em avangin ka player te an inring tawk a, kan khelmuala United kan hmachhawn hunah pawh inrintawk na nasa tak nen kan lo mikhual ang a, chak ngei kan tum ang," a ti.

Manchester Utd manager Louis van Gaal chuan, "Tunhnaiah Wayne Rooney leh Michael Carrick ṭha tak a an rawn khelh avangin ka lawm hle. An ni pahnih hi engtiklai pawha in zir belh duh reng players an ni a, an ni ang players hi an tam lo a ni. Liverpool hi kan tan chuan kan elpui ber an ni a, an khelmual ngeia hneh hi kan tan chuan a pawimawh a ni," a ti.

LVG chuan United-ah a career a hman zawh tur thu sawi lang nghal in, "Ka nupui phei chuan kum nga liamtaah khan chawl turin min duh tawh a, nupui fanau, tu leh fa nei ka nih avangin an bula hun hman tam ka mamawh a ni. Tunah hi chuan ka nupui aiin ka PA ka hmu ngun zawk a, United ka enkawl zawhah hi chuan ka chawl tawh ang," a ti.