December 18-ah Qatar 2022 World Cup

FIFA-in an puang chiang ta. Qatar 2022 World Cup final chu December 18-a khelh tura ruahman a ni.

FIFA taskforce chuan thla hmasa khan Qatar boruak awm dan an zir chiang a, football inelna lian chu nipuia khelh ni loin thlasika khel turin rawtna an siam.

FIFA director of communi­cations Walter De Gregorio chuan, "November thla aṭangin kan khel ṭan a, December-ah kan zo ang. Final hi December 18-a khelh tur a ni a, Pathianni a nih bakah Qatar tan chuan National day a ni," a ti.

World Cup khelh hun thlak a nih chhan hi player-te hrisel­na ngaihtuah vang a ni a, nipuiah chuan Qatar khaw lum lam hian 40°celsius a pel hian ṭhin.

FIFA chuan thlasika khelh a nih avang hian inkhelh hun chhung hi ni 28-ah a pawt tawi dawn a, kum dangah chuan ni 31-31 a awh ṭhin.

European football-a thu­neitute chuan final hi De­cember 23 a khelh an duh a, amaherawhchu FIFA hian player-te hi an inah krismas hmang thei se an duh avangin final hun hi an tih tlai phah lo.

December 18-a final an khelh dawn takah chuan Boxing Day-ah Premier Lea­gue inkhel a awm thei ang. England-ah chuan krismas tukah inkhel a awm ziah a, hun rei tak kalpui tawh a nih avangin an ngai hlu hle.

2019 Women's World Cup thleng tur FIFA-in a puang tel nghal a, South Korea aiah France an thlang. France hian kum 2018 hian Under 20 women's tournament an thleng dawn bawk.