RVL hun a inher chhuak ve ta!

Mapuia Cricket League (MCL) 2015-ah Ramhlun Venglai Cricket Club an champion ta. Nimina Suaka Cricket Ground, Sihhmui-a final hmuhnawm tak khelhah RVL hian Chanmarians chu wicket 5-a hnehin an champion.

RVL i te ber tawp lo

Ramhlun Venglai hi season tharah 1st division team tur ni mahse tun season-ah chuan 2nd division an la ni tlat. 2nd division inel­naah pawh hian an champion lo a, Chhinga Veng hneh loin final-ah an vanduai. He team hian season hmasa khan MCL khel tur hian team auction aṭangin hmun an chang a, an hlawhtling nghal lo.

Tun season-ah erawh an hun a inher chhuak ve ta a, 2nd division team ni chungin thawhrimna leh team thawh hona ṭha tak nen MCL champion nomawi an chawi ta.

Final boruak chu

Tun season-a Mizoram cricket inelnaa team khel ṭha tluang ber chu Chanmarians an ni a, RVL hian Qualifier 1-ah pawh Chanmarians hi an lo hneh lo tawh a, hei vang hian rin kai zawk an ni lo thei lo.

Final hun a thlenga toss-ah Chan­marians an vannei nghal pang a, bat hmasak an thlang. Mahse, final boruak nen tun season tluana khel ṭha em em Chanmarians top order batsman-te'n nidang an pha tlat lo.

Hma takah an batsman pawi­mawh Michael Lalremkima, Abhay Joshi leh K Lalremruata-te an out nghal. Zothansanga (run 28) leh Pritam Gurung (run 26)-te'n Chanmarians innings an rawn khai ding leh a, over 20-ah run 100 an tlin leh thei. Hei hi final boruak nen target pangngai taka ngaih theih a ni.

RVL bat hun a thleng a, an in­hmachhawn hmasaka khel ṭha lo K Vanlalruata (run 25) leh Lal­hruaizela (run 19)-te'n bul an ṭan ṭha a, hei hi a tawp thlenga an chak­na hnar pakhat a tih loh theih loh. An hnunga lut batsman-te'n beisei angin khel ṭha tawk lo mahse a tawp lamah Malsawmdinpuia (run 11) leh William Rinawma Pachuau (run 16)-te'n RVL inning an rawn khai ding. RVL hian over 18.5-ah an target run hi umphain MCL 3rd Edition champion an ni ta.

RVL champion-na kawnga final-a vawm ṭha leh bat ṭha bawk William-a chu Man of the Match-a thlan a ni.

Mimal lawmmawn

He tournament chhunga run 257 vaw chhuaktu Lalhmangaiha, Armed Veng batsman chu 'Player of the tournament' a thlan a nih bakah best batsman-a thlan a ni bawk. Champion team RVL player pawimawh Robert Lalfamkima chuan wicket 11 lain best bowler-a thlan a ni.