ICC World Cup 2015-ah thlengtu pakhat zawk Australia in wicket rukin Pakistan an hneh a, semi-final an lut

Adelaide Oval, Adelaide-a World Cup quarter final inkhelah hian Australia tan fast bowler Josh Hazlewood-a che ṭha a, run 35 chiah pe in wicket li a la.

Ṭhumvawra vannei zawk Pakistan in bat hmasak an thlang a, an thlang fuh lo. Over 49.5-ah run 213 an tlin hman ṭawk tihin an vaiin an out vek a, Australian bowler te an ngam lo hle.

Pakistan tana run siam hnem ber Haris Sohail chuan ball 57 a hma­chhawnah run 41 a vaw­chhuak thei hram a, a out.

Mahni khawtuala khel, khawvel cricket ram ṭha ber pawl Australia tan an target run 214 um hi thil huphurhawm a ni lo. Australia an bat a, hma takah an opening batsman pahnih Aaron Finch leh David Warner te hma takah an out avangin Pakistan in beiseina an nei. Mahse, Pakistan hian an fielding ṭhat tawk loh an tuar a, 'catch' ngei tura ngaih vawi hnih lai an catch lo a, Australia in over 33.5-ah mi pali chiah hloh in an target an um pha, run 216 an tlin. Australia batsman zingah a tawp thleng a dam pahnih ball 66 a hmachhawna run 64 vawchhuaktu Shane Watson leh ball 29 leka run 44 vawchhuaktu Glenn Maxwell te'n an khel ṭha a, Australia an chakpui ta a ni.

Australia hian March 26-ah run 109 a Bangladesh sawptu India chu Sydney khawpuiah semi-final ah an hmawchhawn ang.

Kumin World Cup-a hneh loh la tawng lo India leh an khawtual a khel tur Australia inkhel hi mipui hmuh chak a ni.