Away goal rule sawiseltu Wenger

21st March, 2015

Arsenal manager Arsene Wenger chuan away goal rule an hman ṭhin chu sawiselin hun pangngaiah ni lo in extra time-ah chauh hmanṭan ni se a duh thu a sawi.

Arsenal hi Champions League last 16 aṭangin an tla a, away goal rule hmangin French team AS Monaco chu an hneh lo. Away goal rule hmanga an tlak hnu lawk hian Wenger chuan away goal hman dan hi a sawisel ta a ni.

AS Monaco coach pawh lo ni tawh Wenger chuan, "Away goal rule hi kum 1960-ah khan hman ṭan a ni a, hei hi attacking game khel ṭhin te duhsakna vang a ni. Vawiinah erawh thil a danglam tawh a, thlak a ngai tawh a ni. Kumin Champions League-ah pawh English club pahnih chu away goal rule vangin kan tla a, a lungawi thlak loh a ni," a ti.

Away goal rule hi English League Cup semifinal-ah chuan extra-time zawhah hman ṭhin a ni a, hetiang deuha hman ve hi Wenger chuan a rawt a ni.