LBS Suzuki CYMA Chess-ah Bethlehem Vengthlang pakhatna

LBS Suzuki 5th Inter Branch YMA Chess Tournament 2024 chu August 27-29, 2024 chhung khan R. Dengṭhuama Stadium, Mualpuiah neih a ni a, Bethlehem Vengthlang chu pakhatna an ni. Inelnaah hian Mizoram hmun hrang hrang aṭangin branch 26 an tel a, Reiek chu pahnihna niin Sihphir chu pathumnaah an awm.

Pakhatna BVT hian Rs 30,000, certificate leh trophy an dawng. BT Romawia chu captain a ni a; John Lalrinliana, C. Lalrinsanga, Lalawmpuia leh C. Daniela leh Lalrinfela te nen Bethlehem Vengthlang an tihmingṭha a, David Lalremruata'n (manager) champion team BVT hi a ho a ni.

Inelna kalphung

CYMA Chess-ah hian team khatah player paruk an awm a, player paliin khelin pahnih dang chu substitute an ni. Inel nan hian 'Swiss System' hman a ni a, team 26 hian vawi sarih ṭheuh an khel a, an khelh tur zat an khelh zawha point hmu sang ber an champion.

Team pahnih an inhma-chhawnin player pali ve ve an inhmachhawn a, player pakhat a chakin point khat an hlawh chhuak a, an inhnektawk a nih chuan ½ ve vein an insem thung.

Player pali an inhmachhawn miau avangin team angin chak, draw leh chak lo a awm thei a; a chak zawkin point hnih hmuin, an indraw chuan point khat ve ve an hmu a, a chak lo zawkin point an hmu lo.

Boruak a sang

BVT hian match hmasa berah Bawngkawn (1½-2½) hneh lo mah se Zemabawk North (4-0) leh Dawrpui Vengthar (3-1) te an hneh a, pakhatna ni turin beiseina an nei thar.

Round linaah Bazar Veng (Lunglei) nen 2-2 in an inhnehtawk a, Maubawk (3-1) leh Leitan (3-1) hneh zui lehin round tawp berah Laipuitlang an hmachhawn. Round sarihnaah hian champion thei team li an la awmah an ngaih theih.

Round rukna zawhah Laipuitlang hian point 10 hmuin pakhatna an ni a; Bawngkawn, Reiek leh BVT ten point kua vek an hmu. BVT tan pakhatna ni turin Laipuitlang hneh ngei a ṭul a; Reiek leh Bawngkawn an tel avangin chak chian a ṭul bawk.

BVT khelh zawh hmain Reiek an chak tawh a; BVT-in Laipuitlang lakah 3-0 in hma an hruai mek. BVT aiawh John Lalrinliana (Laltea) chak lo se, Reiek an champion dawn a, chuvangin inkhel an thlir ṭhup. Laltea'n rilru fim a pu a, draw-in an chak thei tih a hria a, a tum a hlen chhuak bawk. BVT-in Laipuitlang chu 3½-½ in an hneh a, an champion. Reiek an vanduai ta thung.

BVT player C. Lalrinsanga'n a khingpui zawng zawng a hneh vek a, champion-na kawngah a pawimawh. Chutihrualin team angin BVT an che ṭha a, tharum hman theih si loh rilru inbeihnaah, an rilru a paukhauh ber a, nomawi an chawi.