Rindika'n Chawnpui chakpui nghal

LZ Juice MPL11-ah Lalrindika Hmar a rawn kir a, Chawnpui FC a chakpui nghal. Nimin tlai khan Chawnpuiin J. Lalbiakliana (Valpuia) goal hmangin Sihphir Venghlun FC 1-0 in an hneh.

Rindika luh hma chiah hian Chawnpuiin Sihphir Venghlun hi 1-0 in an hneh lo a, niminah erawh player 10-a khel chungin point thum an hlawh chhuak ta thung.

Sihphir Venghlun hian first half-ah goal khungna remchang nei mah se second half-ah erawh Chawnpui an che ṭha zawk. Minute 61-naah substitute Jessie Lalmawizuala croner pet chu Armed Veng South tlangval Valpuia'n a tauh goal.

Chawnpui hi vanneih ṭum ni se; Valpuia, James Lalnunchhana leh Jerry Lalchhanchhuaha te hmangin khung belh thei an ni a, an hun ṭha an hmang ṭangkai bik lo. Minute 70-naah defensive midfielder Lalropuia'n yellow card vawi hnihna a hmu a, hnawhchhuah a nih avangin hun tawp lam minute 20 chhung chu Chawnpui hian player 10-in an khelh a ṭul phah a ni.

Rindika Hmar chuan, "Training hun a tlem avangin defending chauh kan la zir a, goal kan chhuah lo a, ka lawm hle. Hnehna kan chan chhan hi coach vang a ni lo a, player-te thawhrim rah a ni," tiin Vanglaini a hrilh.

Chawnpui hian match riat aṭangin point riat an hmu a, pasarihnaah la awm chhunzawm mah se pathumnaa awm Mizoram Police chu point hnih chauhin an pha lo.