Vawiin tlaiah Arsenal inlan dawn

Arsenal chuan vawiin tlai dar 5:00 hian Brighton an mikhual dawn - Mikel Arteta naute hian tun season Premier League match hnih an khelh tawhah hnehna an chang ve ve a, a zawna a vawi thum nan chak an tum ang.

Gunners hian tun hnai season hnih chu EPL an el na thei hle a, hun pawimawh laia point an hloh leh ṭhin avangin nomawi an chawi phak lo chiah ṭhin, tun season chu a bul aṭangin an fimkhur hle tih pawh a hriat.

Nipui bazarah loan hmanga an hawh lao David Raya an la nghet a, midfielder Mikel Merino an la fel tawh bawk. Merino hian training a nei tawh a, training-na lamah hliam tenau a nei nia sawi niin Spain tana koh zingah pawh a tel lo.

Tuna a lan dan chuan Brighton lakah Merino hi a inlan a beisei awm loh a, a player neih sa leh a hman thiam ngai te bawk hmangin Arteta-a'n mikhual a lo dawngsawng leh dawn a ni.

Striker Gabriel Jesus chu khelbawr hliam vangin Aston Villa lakah a inlan thei lo a, tun ṭumah pawh hian tlarhma laiah Kai Havertz bawk a inlan a rinawm.