Conference League khel tur Chelsea

Chelsea chu Europa Conference League khel turin an tling - Blues hi Servette mualah 1-2 in chak lo mah se, an intawn tawhna hmasaah si hnih faia an chak tawh avangin a belhkhawmah 3-2 in an tlang.

Ningani zan Stade de Geneve-a inkhelah Chelsea tan Christopher Nkunku chuan minute 14-naah penalty aṭangin a khung a, mualneitu lamin Jeremy Guillemenot leh Enzo Crivelli te hmangin an chhanglet a, goal dang erawh a lut tawh lo.

Inkhelh ṭan hmain Enzo Maresca chuan a naute a rintawk thu leh a hlauhthawn loh thu a sawi a, chutihrualin inkhel tawp lamah erawh Premier League club hi an rilru a chiai ve deuh tih a lang.

Chelsea hian Champions League nomawi an chawina kha a la rei lo, kum 2021 mai khan European football inelna sang berah an champion, season hmasa erawh kha chuan EPL-ah parukna an ni phak chauh.

Mauricio Pochettino chhuah hnuah Blues hian player 10 ngawt an lalut tawh a, team hmelhmang a danglam tawh hle. Coach thar Maresca hnuaiah hmel thar an nei chho mek - European football an khel tur pawh hi an tan thil lawmawm a ni ang.

Tun season an league match hmasa berah Manchester City ngam lo mah se an insiamṭha a, match pahnihnaah chuan Wolves 2-0 in an sawp. Pathianni zan dar 6:00 hian Crystal Palace an mikhual zui lehnghal ang.