UEFA-in Ronaldo a chawimawi

UEFA-in 2024/25 UCL draw neihnaah Cristiano Ronaldo hnenah 'Special Award' an hlan. Portugal forward hian UEFA Champions League-a goal khung tam ber record a siam avangin UEFA president Aleksander Ceferin hnen aṭangin chawimawina hi a dawng.

Ronaldo hian UCL-ah kum 18 aia tam a khel a, a hnathawh ropui tak hi UEFA-in hre rengin August 29, Ningani zan khan Grimaldi Forum, Monaco-ah chawimawina hi an hlan.

Al Nassr forward Ronaldo hi Sporting Lisbon, Manchester United, Real Madrid leh Juventus tan a khel tawh a, UCL-ah match 183 aṭangin goal 140 a khung. Amah hnaih bertu Lionel Messi aiin goal 11-in a khung tawh a, Barcelona tana a khel mek Robert Lewandowski aiin goal 46-in a khung tam zawk.

UEFA president Aleksander Ceferin chuan, "Ronaldo hi UCL-a player ropui zinga langsar ber a ni a, inelnaa a goal khung record hian hun rei tak thleng a daih dawn a, ṭhangthar tan pawh khum tur chuan chona lian tak a ni ang," tiin uar takin a fak.

Ronaldo hi UCL-ah vawi sarih top scorer a ni a, top scorer ni hnem ber a ni. Portugal forward hian Manchester United tana a khelh laiin UCL nomawi a chawi a, Real Madrid a khelh hnuah vawi li champion lehin vawi nga nomawi chawi thei hmasa ber a ni a, UCL final pathuma goal khung thei vek awm chhun a ni.

UCL-a goal khung zawn rei ber record pawh Ronaldo hian a kawl a, June 2017 aṭanga April 2018 chhung khan match 11 chhung chhung a zawnin goal a khung a, UCL-ah vawi riat ngawt hattrick a siam bawk.