Second round-ah Alcaraz a tla

Carlos Alcaraz chu world No 74 Van de Zandschulp hneh loin US Open second round-ah a tla - Spanish star hi Grand Slam bikah a zawnin match 15 a chak hman, a record duhawm tak hi tunah chuan a tawp ta rih a ni.

Nimin zing khan Arthur Ashe Stadium, New York-ah Alcaraz hi a inlan a, chak tura rinkai zawk pawh a ni. Mahse, seeded pathumna hi 6-1, 7-5, 6-4 in a chak lo zawkah a ṭang.

Nikum khan Van de Zandschulp hian harsatna hrang hrang a tawk, a kephah vei lam leh kerek a hliam a, a hnuah ke ding lamah nghawng a nei bawk, atan inkhelh leh beiseina pawh a tlahniam hman hle.

Mahse, zawi muangin a ṭha chho leh zel a, tun season chu match a khel ve leh ta nual - May thla khan French Open khelin a match hmasa berah a chak lo, clay court inelna lian aṭanga a tlak hnu hian tennis chawlhsan a tum hman hial.

Amaherawhchu, dawhthei takin a taksa dinhmun a nghak a, tunah chuan tennis a khelh tawh china a chakna lian leh ropui ber a tawng, atan chuan world number 3 hneh hi thil lian leh sang ber a ni.

Dutch player Van de Zandschulp chuan, "Thla thum liamta maiah kha chuan hun hrehawm tak ka hmang a, tennis chawlhsan mai pawh ka rilruk hman, mahse tunah chuan hlimna sang tak ka tawng ve leh ta.

"Ka chak hlimah phei hi chuan a hlutna leh engtiang taka lawm tur nge tih pawh ka hrethiam lo, ina ka hahdam deuh hunah a hlutna hi ka la hrethiam cho ve chauh ang," tiin a sawi.

Alcaraz hian beiseina sang tak nen New York khawpui a pan, tun hma lama a lo hlawhtlin tawhna a ni. Tun season bikah French Open leh Wimbledon title a lak bawk avangin a buk pawh a rit, mahse a duhthusam zawng zawng a thleng nghal vek thei bik lo.

Seeded pathumna Alcaraz chuan, "A nihna takah chuan ka khingpui chauh ka hmachhawn lo, keimah leh keimah ngei pawh ka inhmachhawn tel ni berin ka hria. Ka rilru put hmang kha a tir aṭangin a dik tawk lo deuh a ni.

"Kan duh leh beisei anga thil a kal nghal vek loh hian dawhtheih a ngai hle ṭhin, chu zirlai chu tun ṭumah hian a takin ka zir chhuak a ni," a ti. Set hnihna a hloh dawn hnaiah phei chuan, amah tihsual vangin a khingpui hi a zawnin point hnih a pe a ni.

Mipa world number 1 Jannik Sinner erawh a chak - Italian tlangval hian Alex Michelsen lakah 6-4, 6-0, 6-2 in hnehna a chak. Sinner hmachhawn theih zinga mi Alcaraz a tla tawh si a, atan final kawng pawh a awlsam sawt mai thei.