Kolasib an rawn kang leh hret

Inter District Wrestling Championship neih laiah, Ningani zan thleng kha chuan Greco-Roman style-ah Kolasib an che ṭha a, an elpui Aizawl leh Serchhip lehpelin an sang ber.

Mizo palian inchai champion lai cho thei tur a chiang hnai tawh a; Lalremtluanga'n Laldinthara chungnung takin a hneh a, a hmawrbawknaah Lalrinchhana Sailo nen title fight-a tel tur zawk nih an inchuh dawn. Nizan khan inelna neih zawh tura ruahman a ni a, rokhawlhna dang a awm loh chuan result a chiang hman ang.

LPS Arena, Falkland-ah Mizoram district 11 zinga pasarih an inel a, ni hmasa berah sub junior aṭangin Kolasibin gold medal medal panga lain hma an hruai. Mahse, Ninganiah pakhatna nihna an neih belh lo avangin pathumnaah an tla hniam.

Ni hnihnaah senior huanga greco-roman style inelna chi thum zawh fel a ni a, Kolasibin gold medal pahnih an lak mai bakah 58 kg huangah dawhsan luah fai vekin John Lalremmawia a chak ber a, Lalhumhima'n silver medal lain David Lalruatpuia'n bronze medal a dawng a ni.

40kg huang final-ah Kolasib ve ve inchai bawkin Isak Lalmalsawma'n Jonathan Vanlalngaihsaka a hneh a; junior freestyle 58 kg final-ah Lalnuntluangi'n Lalduhzuali (Serchhip) hnehin gold medal medal a la bawk.

Kolasibin gold medal paruk nen medal 13 dawng tawhin hma an hruai a; Aizawl tan junior freestyle 50 kg-ah Esther Lalchhanchhuahi leh 70 kg-ah Lalnunsanga an champion ve thung a, gold panga nen medal 24 la tawhin pahnihnaah an awm.

Senior greco-roman style 65 kg-ah Lalchhanhima a champion a, Chhanhima a hlawhtlinna hi avangin Saitualin gold medal an lak hmasak ber leh awmchhun a ni rih. Senior freestyle 50 kg-ah Elizabeth Kawngkharmawii'n Lunglei tan gold medal hmasa ber a thawk chhuak bawk.