Champion lai Real an tawlhthlu leh ta!

Real Madrid tan khua a var thei lo - Las Palmas khelmualah an chak zo lo a, 1-1 in an inhnehtawk. Real hian league match thum an khelhah vawi khat chiah chak an la nei a, point nga an hmu mek.

Las Palmas khelmualah Real beisei angin thil a thleng lo a, minute ngana lekah Spanish club tenau Las Palmas zawk hian Alberto Moleiro hmangin goal an khung a, 1-0 in hma an hruai.

Real Madrid tan Vinicius Júnior chuan penalty hmangin si phurh sutna goal a khung a, hun tawp thlenga goal dang a luh loh avangin 1-1 in an inhnehtawk - Real tan result lawmawm lo a ni.

A har a ni

Real tan hliam vangin Jude Bellingham a la inlan thei lo a, captain Luka Modric-a'n bul a ṭan. Tlarhmaah Kylian Mbappe leh Vinicius te dan pangngaiin an lut a, Rodrygo aiah Real Valladolid laka goal khungtu Brahim Díaz a lut.

Team pahnih inrem dan thlirin Real hi chak chiang tura ngaih an ni a, mahse, football ngaihnawmna chu rin lawk anga thil a thleng vek kher lo hi a ni - minute ngana lekah Scotland striker Oli McBurnie chuan Moleiro tan a siamsak a, kum 20 mi attacking midfielder hian ṭha zeta la lutin, goal-ah a chantir.

Second half-ah Real vanneihna a her chhuak a, Alex Suarez-a handball vangin penalty an hmu - penalty pet turin Vinicius a lo pen chhuak a, Brazilian forward hian harsatna nei loin goal-ah a chantir.

Real an NIL

Las Palmas khelmualah beisei angin Real an khel lo a, an chance neih khung an harsat bawk. Endrick leh Kylian Mbappe ten hun ṭha bik an khawhral a, Mbappe hian league match thum a khelh tawhah goal a la khung lo!

Mualneitu goalkeeper Jasper Cillessen chuan Antonio Rudiger, Federico Valverde, Aurélien Tchouaméni leh Vinicius-a te chance a dansak vek a, Real keeper Thibaut Courtois pawhin save ṭha zet vawi thum a nei.

Las Palmas hian Viti Rozada hmangin chakna goal an khungah an inngai zawk hial a, mahse, offside vangin pawmsak an ni lo a, Real an vannei - Pathianni zan dar 1:00-ah Real Betis an mikhual ang.