Kompany enkawl Bayern hi...

Season liam ta khan Bayern Munich-in mak takin nomawi an chawi lo a, tun season-ah indinthar tumin Vincent Kompany an lalut. Bayern hian DFB Pokal-ah club tenau Ulm sawp mah se Bundesliga match hmasa berah Wolfsburg 3-2 chauhin an hneh.

September 1, Pathianni zan dar 9:00 hian Bavarians-in anmahni ang bawka match hmasa bera chak SC Freiburg an hmachhawn dawn a, Kompany vangin ngaihven a hlawh ang.

Wolfsburg an hmachhawn ṭumin Jamal Musiala hmangin khung hmasa mah se Wolsburg-in Lovro Majer hmangin an lehthal. Bavarians an vannei a, Jakub Kaminski-a'n an lama a tihluh zarah leh hun tawp dawn hnaiha Serge Gnabry goal hmangin an chak hram.

Bayern hian nipui bazarah player an chan ve nual a, lak belh an neih bawk. Pathianni zan hi transfer zawh hnua an match hmasa ber tur a nih avangin an nih dan tur tak tiin a sawi theih ang. Kompany hnuaia Allianz Arena-a league match an khelh hmasak ber tur a nih avangin ṭawimawhtu an nei ṭha dawn.

Chutihrualin Freiburg hian match hmasa berah VfB Stuttgart 3-1 ngawtin an sawp a, Bayern tan fimkhur a ṭul dawn. Season liam taa Bundesliga top scorer Harry Kane-a'n league-ah goal a la khung lo a, English striker hi en bik tur a ni.