Match hnihnaah Osaka a chak lo

Naomi Osaka chuan tun hma lama a ropuina ang neih let tumin bei ngial mah se a ka hlawhtling thei rih lo - nimin zing US Open second round inkhelah Osaka hi Karolina Muchova lakah 6-3, 7-6 (7/5) in a chak lo.

Japanese star Osaka hian 2018 leh 2020 khan US Open nomawi a lo chawi tawh, hei bakah hian Grand Sloam title dang pahnih a la tawh bawk, a hnu lamah erawh fa a neih avangin tennis a chawlhsan lailawk.

Kum khat chuang a chawlh hnuah tennis a khel thar leh a, tun hma lama a khelh dang anga ṭha kha chuan a khel chhuak thei rih lo a ni. Tun season atan chuan Grand Slam match khelh tur pawh a nei dawn tawh lo tihna a ni.

Kum 26 mi Osaka chuan, "Ka che rangin ka tlan tam hle bawkin ka hria, mahse kei aiin ka khingpui kha a khelh ṭhat zawk miau avangin kawng a inhawng lo," a ti a, beidawng mai loa tournament dang khelh erawh a la tum.

Hmeichhe inkhel dangah Iga Swiatek erawhin third round a lut - Polish nula hian Ena Shibahara chu 6-0, 6-1 in a hneh a, tun season kal laiah match 55 ngawt hnehna a chang tling ta chiah.

Champion rinkai zing a, world number 1 Swiatek hmachhawn theih zinga mi ni bawk Elena Rybakina erawh hliam vangin second round-ah a inhnukdawk thung a, ani bakah hian 2016 finlaist Karolina Pliskova pawh kerek hliam vangin a inkhel tluan thei lo.