Arsenal kalsantu Man City

Premier League champion lai Manchester City chuan tun hnaia an elpui ber Arsenal an nghak lo - Gunners an tawlh thluk laiin Pep Guardiola naute chuan point thum an hlawh chhuak thung.

Inrinni tlai khan Emirates Stadium-ah Arsenal leh an mikhual Brighton chu 1-1 in an inhnehtawk. Mikel Arteta nauten point an hloh tih hresa chungin Man City an inlan a, striker ṭha Erling Haaland-a hattrick hmangin West Ham chu 3-1 in an hneh.

Rice an hnawtchhuak

Arsenal lamin season bul an ṭan fuh ang bawkin inkhel bul pawh an ṭan ṭha zawk. Bukayo Saka ball pek chu Kai Havertz-a'n mawi zetin a khung, goalkeeper Bart Verbrugge rawn kal chhuak chu lo pet khumin chawlhlawk hma deuhin goal hmahruai a khung.

Second half tir lamah thil a danglam, mual sir lamah Rice chuan Brighton lamin freekick an pet tur a ti khawtlai det - Brighton defender Joel Veltman chuan a rawn pet tlu, English midfielder hi tlu dera ngaiin referee Chris Kavanagh chuan card a phawrh, yellow card pahnihna a ni.

Player tam zawk Brighton tan Joao Pedro chuan si phurh sutna goal a khung a, a dang erawh a lut zui lo. Gunners tan Havertz leh Saka ten remchang nei ve ve mah se Verbruggen an paltlang lo. Seagulls substitute Yasin Ayari khung tur pawh David Raya chuan a lo dansak ve bawk.

Arsenal tan Rice hnawhchhuah hi channa lian tak a ni dawn. EPL match 245 a khelh tawh china red card a hmuh hmasak ber niin, an match lehpeka Tottenham an khelh hunah a inlan thei lo ang - midfielder thar Mikel Merino chu hliam vangin a chawl rih bawk a ni.

Gunners manager Arteta chuan, "Dan ang chuan VAR hmangin a en thei, a dawt chiaha thil thleng pawh kha dan hmang bawkin a en thei," tiin Rice hnawhchhuah a ni chu mak a tih thu a sawi a, rang taka freekick pet tum ni si Rice zawna ball an dah chu a hrethiam lo.

Premier League dan ang chuan, referee-in ball a tih thih tawh a, freekick pet theih a nih tawh hnua lo tih khawtlai chu hrem theih a ni thung. Brighton manager Fabian Hurzeler chuan Rice chu hnawhchhuah ngei tur a nih tu a sawi ve thung.

Haaland leh hattrick

Erling Haaland hming dawtah hi chuan 'Goal' tih ziah a ngai leh ṭhin. Manchester City striker hian Ipswich Town lakah hattrick a siam zo chiah a, an match dawt leha West Ham lakah pawh goal thum tho a khung, tun season EPL match thum aṭangin goal sarih a khung a ni.

Norway striker hian Bernardo Silva ball pek fing chu um lutin, defender pahnih inkar aṭangin an goal khatna a khung. Hammers hian an sut ve mai, forward Jarrod Bowen-a cross chu defender Ruben Dias chuan anmahni lamah a ti lut.

Man City leh Haaland an inlar chhunzawm - Rico Williams ball pek chu a ke ding lamin a lo dang per zauh a, laklawh nei miah loin a ke vei lamin a hlap lut zui, keeper Alphonse Areola tan dan ngaihna a awm lo.

Haaland hian EPL bika hattrick vawi riatna siam turin Matheus Nunez siamsak a khung zui leh bawk, awmna tur hmun dik taka ball a chan thiam bakah a hmawr bawk a thiam tel a, atan goal khung turin harsana a awm lo a ni ber mai.

Euro 2024-ah khan Haaland te tam Norway hi an tling lo, player ṭha tam tak an inkhelh laiin hahchawlhna hun a nei a, training a nei ṭha bawk. Haaland chuan, "Chawlhna hun ka ngah a, thahrui ka nei tam tawk bawk - a aia tam khung turin ka inpeih," a ti.

A zawna EPL vawi li champion thei Man City hian tun season bul an ṭan fuh hle, match vawi thum an khelh tawhah an la chak vek - hliam leh harsatna dang takin a tlakbuak viau a nih ngawt loh chuan nomawi chhuhsak an harsa dawn hle tih a chiang.