Lalsangliana hmachhawn tur Lalrinchhana Sailo

2nd September, 2024

Mizo palian inchai champion lai Lalsangliana hmachhawn tur a chiang ta, hun rei tak chhunga lo kawl tawh champion kawnghren chuhpui turin Lalrinchhana Sailo a rawn ding chhuak dawn.

Mizoram Wrestling Association (MWA) hian 'Title Fight' neih hun tur an la ti chiang thei rih lo, hetihrual hian MWA hruaitute aṭanga Vanglaini thu dawn danin kumin tawp lamah chuan neih tura ruahman a ni a, a hun leh ni tih chian hmabak a la ni thung.

Zirtawpni zan khan Inter District Wrestling Championship vawi sarihna rualin Mizoram Inchai Title Fight-a inlan tur zawnna chu a hmawr bawk a ni. Palian champion cho tur zawnnnah Lalrinchhana Sailo chuan Lalremtluanga a hneh.

LPS Arena, Falkland Venga inchaihah North Vanlaiphai pa chak, kum 29 mi Rinchhana'n thawh thum an inchai chhungin 7-2-in hma a hruai. Thawh hnih dang la awm mah se Zobawk tlangval Remtluanga'n a dar a tih nat avangin a khel zawm thei ta lo a ni.

Hnehna a chan hnuah Lalrinchhana hian Sangliana hnen a tum thu a sawi zui nghal a, champion lai Sangliana pawhin Lalrinchhana a lawmpui thu sawiin, lawmpui viau mah se a dam a nih phawt chuan a champion belt humhim ngei a tum tih a sawi bawk.

Palaihawl title kawltu Remruatpuia (Saitual) nena innuai turin Ngursangzuala'n fiahna hnuhnung a pal tlang hram a, Serchhip tlangval RB Lalthansanga nen thawh nga an inchai hnuah 2-1-in a chak.

Palaihawl title fight-ah Saitual inchai chak ve ve an intawng dawn. Patê champion B. Lalawmpuia (Thenzawl) hmaa ding turin Saitual inchai chak tho Lalchhanhima a tling bawk a, amah ang bawka Patê champion ni tawh Bulfekzawl chhuanvawr Lalawmpuia a hneh a ni.

Nulian champion Hmangaihsangi (Dilkhan) nena inchai turin Lunglei nula Zodinpuii'n chuan Lalsiamthari (East Lungdar) a hneh. Nutê title chuh tur zawnnaah Kolasib nula Lalnuntluangi'n chungnung takin Veronica Lalbeiseii a hneh bawk. Nulaihawl title chuh turin Champhai inchai chak Peticost Lawmsangpuii chiah a inziak lut a, champion lai Elizabeth Rohlupuii (Melriat) hmachhawn thei turin a tling nghal a ni.