Durand Cup-ah North East United an champion

Asia khawmualpuia tournament upa ber Durand Cup-ah NorthEast United an champion - Highlander hian Inrinni zan khan final-ah Mohun Bagan chu penalty hmangin an hneh a, an club chanchina a vawi khat nan champion nomawi an chawi.

Salt Lake Stadium, Kolkata-ah inkhel en turin fans 52,391 an pungkhawm a, heti zat pungkhawm zinga tam zawk hi Mohun Bagan ṭantu an ni. Mahse, Kolkata club lakah 2-0 a an hnufual chungin NorthEast hian si phurh an sut zo a, penalty-ah 4-3 in an chak zui.

Bagan tan hian Jason Cummings leh Sahal Abdul Samad ten goal khungin, 2-0 in hma an hruai a, Highlander hian Alaaeddine Ajaraie leh Guillermo Fernández hmangin an chhanglet a, penalty hmanga chak zuiin, nomawi an chawi ta a ni.

Bagan phawt

José Francisco Molina-a'n Bagan tana tournament a hmachhawn hmasak berah nomawi chawi a duh a, a player neih ṭhat ber a thawhchhuahpui - Mizo tlangval Lalengmawia Ralte (Apuia) pawh inkhel bul ṭantu zingah a tel a, Greg Stewart leh Jason Cummings te tlarhmaah an inkawp bawk.

A tawi zawnga sawi chuan team pahnih an inthlau a, Bagan chunga beiseina a sang. Beisei ang ngeiin Kolkata club-in bul an ṭan ṭha a, minute 11-na lekah Sahal Abdul Samad-a penalty hlawhchhuah chu Australian striker Cummings chuan hmahruaina goal ni turin a khung - thawm chu ring tak a ni.

Bagan hian an la duhtawk mai lo. First half hun pek belh minute nganaah Sahal Abdul Samad chuan an goal hnihna a khung ve leh a, 2-0 a hmahruai chungin chawlhlawk an hmang a, champion tur a chiangah a ngaih theih.

Comeback ropui

Mahse, Highlander-in ngaihdan dang an nei a, thawnthu her danglam an tum - minute 55-naah player thar, Morrocan forward Alaeddine Ajaraie chuan si phurh sutna goal a khung a, Guwahati club hi an phur sawt.

Hetah hian an duhtawk mai lo. Minute thum hnu lawkah Guillermo Fernández chuan goal a rawn khung ve leh a, si phurh an sut zo der - kum 31 mi Fernandez hi Athletic Bilbao tan pawha lo khel tawh niin, tun nipuiah NorthEast hi a zawm a, Durand Cup nomawi an chawi nan match rukah goal ruk khungin, assist vawi hnih a nei thei!

Goal dang lut loin hun a tawp a, Durand Cup-ah extra time khelh a nih loh avangin penalty pet zui a ni. Highlander tana pettuten an pet goal vek laiin, Bagan tan Liston Colaco leh Subhasish Bose ten an chhuih lut ve lo a, NorthEast United an champion.