Premier League: Transfer a tawp ta

European top five league zinga ngaihven hlawh ber Premier League nipui transfer chu August 30, Zirtawpni zan khan khar a ni ta a, transfer lian tham tia sawi hluai tur thleng lem lo mah se, mak tak tak thleng erawh a awm nual!

Raheem Sterling-a'n rin loh takin Arsenal a pan a, Jadon Sancho-a'n Manchester United chhuahsanin Chelsea lamah a puanthuah a tel a, Ivan Toney pawhin Premier League mangṭhain Saudi Arabia a pan ta daih.

Manchester United-in transfer tawp nia player lei to ber dinhmun an luah a, Sancho an chhuahtir hmain Paris St-Germain leh Uruguay midfielder Manuel Ugarte chu pound maktaduai 50 chuangin an la lut - £42.1mtd an pe phawt ang a, £50.5mtd thlenga sang chho thei tur a ni.

Scotland international Scott McTominay chuan a hmangaih United chhuahsanin, Serie A club Napoli chu £25.7mtd-in a zawm a, Arsenal striker Eddie Nketiah chuan Crystal Palace chu £30mtd-in a zawm bawk.

Club lian an che na lo!

Transfer dang zawnga thawm nei na ṭhin Premier League club lian, champion tur rin kai ho tun nipui transfer-ah an che na tawk lo a, Manchester City leh Liverpool phei chu player la lut ve bawk mah se, an hlawk zawk.

City chu Premier League club zinga sum seng tlem ber an ni a, Brazil winger Savinho lakluh nan £21.4mtd seng mah se, forward Julian Alvarez, defender Joao Cancelo leh Taylor Harwood-Bellis hralhna aṭanga an sum hmuh nen tun nipuiah £115.8mtd hlawkna an tel.

Season hmasa pahnihna Arsenal-in £93.9mtd an seng a, Italy defender Riccardo Calafiori lakluh nana £38.4mtd an sen chu player mala an sum sen hnem ber niin, Spanish duo David Raya leh Mikel Merino an la bawk. Mahse, £76.8mtd man player an hralh avangin an inseng hnem lo.

Jurgen Klopp-a chhuahsan Liverpool an indinthar viau dawn emaw tih laiin midfielder Federico Chiesa leh goalkeeper Giorgi Mamardashvili chiah an la lut a, Fabio Carvalho, Sepp van den Berg leh Bobby Clark te an hralh bawk si avangin tun nipui transfer-ah player lei leh hralhnaah £14.4mtd an hlep daih!

Chawl lo Chelsea

Todd Boehly leh a ṭhianten Chelsea an lei hnuah transfer bazar-a player lei an atchilh laklawh a, May 2022-a London club an lei hnua player lei nana an sum sen belhkhawm chu £1.3tld a tling der tawh.

Blues hian tun nipuiah player 10 ngawt an la lut a, hetihrual hian 12 an chhuahtir ve tho tih erawh hriat tel sak a ṭha - hei vang hian player lei nan £203mtd lai seng mah se, £46.5mtd an la hlep thei tho thung.

Chelsea hian an academy chhuak Conor Gallagher chu Atletico Madrid hnenah £35.6mtd-in an hralh a, Ian Maatsen chuan £38mtd-in Aston Villa a zawm a, Romelu Lukaku pawhin Napoli chu Antonio Conte hnuaia khel turin £28.2mtd-in a zawm.

Blues-in player lakluh nana an senah hian Belgian goalkeeper Mike Penders (£17mtd) leh Estevao Willian (£29mtd) te man chu chhut tel a ni lo a, player pahnih hian inremna neihpui tawh mah se, season thar nipui transfer-ah London club hi an zawm ve dawn chauh.

Brighton an che na

Tun nipui transfer-a rin loh taka che na chu Brighton & Hove Albion an ni a, anni hian Chelsea angin sawi hlawh lo mah se, nipui transfer-ah player pakua ngawt an la lut - player paruk an hralh chhuak ve thung bawk.

Brighton hian player lakluh nan £195.7mtd ngawt an seng a, an player hralhna man an hmuh aṭanga paih leh hnuah pawh £153.6mtd lai an la sen avangin, player lei leh hralh chhut tel vek hnua tun nipuia Premier League club sum seng hnem ber an ni.

League match thum khelh tawha tlawm la nei lo Brighton hian an club player man to ber ni turin Leeds aṭangin Georginio Rutter chu £39.9mtd-in an la lut a, Yankuba Minteh (£29.9mtd) tan an insen huai bakah Ferdi Kadioglu, Brajan Gruda, Mats Wieffer leh Ibrahim Osman te ho chu £25mtd aia to vekin an lei bawk.

Premier League club zingah an club record siama player la lut an awm nual a, Bournemouth-in striker Evanilson (£31.7mtd), Brentford-in Igor Thiago (£30mtd) leh Fulham-in Emile Smith Rowe (£27mtd) an lakluhna te chu club record a ni a, Aston Villa, Ipswich, Nottingham Forest leh Tottenham Hotspur ten club record an siam vek bawk.

Sterling & Sancho

Chelsea forward Raheem Sterling chuan season khat chhung loan-a khel turin Arsenal a zawm a, English forward tawnhriat ringawt pawh hi Gunners tan ṭhatpui tham a ni dawn - kum 29 chiah a la ni chungin English football-a a sulhnu a hraw a, Gunners tan transfer duhawm tiin a sawi theih.

Sterling chuan, "Ka awih lo zawk a, ka phur takzet a ni. Engkim ka thlir hian, Arsenal nen hian kan inrem thlapah kei chuan ka ngai a, transfer kan tifel hman hi ka lawm khawp mai," a ti a, Mikel Arteta nen City-ah an lo inhrawn tawh avangin an inhrechiang sa bawk.

Hetihlai hian Jadon Sancho chuan Manchester United aṭangin Chelsea chu loan-in a zawm bawk. Season tawp thleng loan hian a khel ang a, Blues hian an duh chuan £20-25mtd inkarin a nghetin an la lut zui thei ang - a hlawh tam zawk chu London club hian an tum bawk ang.

Sancho chuan, "Didier Drogba leh Frank Lampard te kha ka player ngaihsan leh entawn an ni a, an club khelh ṭhinnaah ka khel ve thei dawn ta - ka tan chuan a lawmawm takzet a ni," a ti a, Stamford Bridge-ah hming chher a tum hle.