Ramsanga'n international bronze hlawh chhuak

Kotak India Junior International Series-a bronze medal a hlawhchhuah hnuin, C. Lalramsanga'n international tournament-ah bronze pahnih a hlawh chhuak leh ta - Yonex-Sunrise India Junior International Grand Prix 2024-ah Durtlang rawlthar hian bronze pahnih a hlap chhuak.

Ramsanga hian Mixed doubles leh Under 19 Men's doubles-ah bronze a hlawh chhuak a, tun hnaiah international level medal pahnih a hlawh chhuak tihna a ni. Pune khawpuia neih inelnaah hian Ramsanga hian mixed doubles-ah kar hmasa lawka bronze a lakpui Pragati Parida chu a ṭanpui leh a, bronze bawk an hlawh leh ta.

Mixed doubles-ah hian Ramsanga leh Parida te hian first round-ah Chinese Taipei shuttler Cheng Han Tsai leh Chiao En Yu-te inkawp chu 21-18, 21-13 in an hneh a, second round-ah Saurav Sahu leh Zenith Abbigail (IND) te inkawp chu 21-11, 21-18 in an hneh zui.

Quarterfinal-ah kar hmasa lawka thil thleng bawk a thleng nawn leh a, International tournament lianah Mizo an intum nawn - Kotak India Junior International Series-a an hneh tawh Lalrempuii leh a partner, Arsh Mohammad-te an tum leh a, Ramsanga te ṭhiandun bawk chungnung lehin, deciding-ah 11-21, 21-19, 23-21 in an chak.

Ramsanga te ṭhiandunin bronze-a lungawi duh loin, semifinal paltlang ngei tum mah se, Indonesian pair, Mohammad Vito Annafsa leh Keyla Annisa Putri-te ṭang dun chu deciding game-ah, 21-17, 15-21, 21-15-a ngam loin, a vanduai zawkah an ṭang.

U19 Men's Doubles category-ah Ramsanga'n Param Choudhary chu kawppuiin, semifinal an thleng leh bawk. Ramsanga leh a ṭhianpa hian first round-ah anmahni ang thoa Indian pair, Mridul Jha leh Angad Muchal-te inkawp chu 21-14, 17-21, 21-16 in an hneh phawt a, second round-ah Chinese Taipei shuttler Huang Hong-Yu leh Yan Bin Huang-te chu 21-16, 19-21, 21-18 in an hneh leh bawk.

Quarterfinal-ah pawh harsatna lian tawk loin Chris Anjen Baptist leh Rehaan Phutela (IND)-te ṭangdun chu 21-15, 21-12 in an hneh leh. Semifinal-ah inkhel hmuhnawm pho chhuakin, Indian pair tho, seeded no. 2 Bhavya Chhabra leh Arsh Mohammad-te inkawp chu 22-20, 21-19 in an ngam lo.

He tournament-ah hian Mizo pali an tel a, Lalrempuii chu Mixed doubles bakah U19 Women's doubles category-ah a inlan a, second round-ah a vanduai. H. Lalṭhazuala (U19 Men's singles) leh Lalrinkimi (U19 Women's singles) te pawh first round-ah a vanduai zawkah an ṭang ve ve a ni.

August thla chhunga international level bronze pathum hlawh chhuaktu Ramsanga hi TATA Trusts, NEIDA, Mizoram State Sports Council leh Mizoram Badminton Association te thawhhona kaltlanga inzir ṭan niin, Pullela Gopichand Badminton Academy-ah hun eng emaw chen a awm a, tunah hian Badminton Association of India-in a din, National Centre of Excellence, Guwahati-ah a inzir mek.

MBA chuan Mizoram leh India tihmingṭhatu Ramsanga chu an lawmpui thu sawiin, hlawhtlinna sang zawk chang zel tura an duh thu an sawi.