Champion lai Djokovic a tla

Novak Djokovic chuan a ṭha lo zawngin Carlos Alcaraz hnung a zui - US Open khelh laiah player ṭha leh champion tura rinkai pahnih te hi third round lut phak loin an tla.

Inrinni zing khan Djokovic hian Alexei Popyrin a hmachhawn a, inkhel hmuhnawm takah seeded 28-na Popyrin hi 6-4, 6-4, 2-6, 6-4 in a chak; Djokovic erawhin tun hnai kum 18 chhunga US Open aṭanga a tlak hma ber ṭum a tawng thung.

Serbian star Djokovic hian kum 2017 aṭang khan Grand Slam pakhat zinga eng emaw ber tal chu season tin a la ziah, a record duhawm tak hi kuminah chuan a chhawm nung thei dawn ta lo a ni.

Major title 24 tehmeuh a nei tawh a, midang chunga leng a ni - kuminah lak belh lo mah se a ngaihhlut tak Olympic gold medal a la vaw chhuak thung, atan chuan kum chhinchhiah tlak leh hlu tak a ni tho ang.

Popyrin lakah Djokovic hi a khel ṭha tawk lo hle, vawi 14 ngawt mai double fault a nei, tennis a khelh tawh china match khata a neih tam ber ṭum niin a tihsual vanga a khingpui in point a hmuh chu vawi 49 tehmeuh a ni.

Kum 37 mi Djokovic chuan, "Tournament tir aṭang khan ka khel ṭha lo hle, tun ṭumah chuan tennis ka khelh tawh china a fuh lo ber anga chhal theih ka tawng niin ka hria, third round kha thleng ni ila chuan hlawhtlinna a ni hial ang," tiin a sawi.

Djokovic leh Alcaraz an tla tawh a, tunah chuan world number 1 Jannik Sinner leh Daniil Medvedev te tan champion theihna kawng a inhawng zau, anni pahnih bakah hian Alexander Zverev a la awm bawk - Zverev hian tukinah Brandon Nakashima a hmachhawn ang.

Australian Open 2024 champion, tun ṭuma seeded pakhatna ni bawk Sinner hian a khingpui Christopher O'Connell chu 6-1, 6-4, 6-2 a hnehin last 16 a inhlangkai a, a vawi khat nan US Open champion nih a tum dawn a ni.

Inkhel dangah world number 5 Medvedev pawhin Flavio Cobolli chu 6-3, 6-4, 6-3 a hnehin a thiam zual 16 zingah a inhlangkai ve bawk. Medvedev hian 2021 khan New York khawpuiah hian hlawhtlinna a lo chang tawh, kuminah pawh beisei a nei sang chho hle ang.