Goal sarih khung thei Barcelona

Real Madrid-in chak an harsat laiin an elpui Barcelona erawhin nuam tiin goal an khung a, Hansi Flick-a hoten Real Valladolid 7-0 ngawtin an sawp. Nou Camp-a inkhelah Raphinha-a'n hattrick a siam a; Robert Lewandowski, Jules Kounde, Dani Olmo leh Ferran Torres ten goal khat ṭheuh an khung.

Inrinni zan inkhelah Catalan club-in football mawina an pholang a, goal sarih khung lai khung mah se an khelh dan en chuan goal 10 khung thei an ni. Leeds United aṭanga Barca zawmtu Raphinha hian theihna a nei sang a, goal hmahruaitu khungtu ni ringawt loin hattrick a siam.

Brazilian winger Raphinha hian ram tan goal sarih a khung tawh a, mak ang reng tak chu amah aia hming langsar zawk Real Madrid winger Vinicius Junior aiin ram tana khel tlem chungin goal a khung tam zawk - Vini hian ram tan goal nga a khung tawh.

Hansi Flick hnuaiah Lewandowski pawhin a theihna a lantir nghal a, Bayern Munich striker hian cool takin goal hnihna a khung. Kounde-a'n forward ṭha mite goal khung dan angin a khun a, Olmo pawhin goal a khung zel. Leipzig aṭanga Barca zawmtu Olmo hian ṭum hnih goal ban a pet per mah se a vanduai reng lo, minute 82-naah ṭha taka lalutin a pet goal. Torres-a'n goal sarihna a khung leh bawk.

Barca hian match li an khelh tawhah hnehna an la chak vek a, match hmasa pathumah 2-1 vekin chak mah se tun ṭumah erawh goal chhuah loin goal sarih an khung.

Point 12 an hmuh vangin Flick-a'n Catalan club tan hna ṭha tak a thawk a tih theih a, hei bakah hian player naupang Lamine Yamal a che ṭha a, kum upa zawk Lewy leh Raphinha te an che ṭha a, player thar Olmo a tla tlum nghal. German manager Flick-a'n bul a ṭan ṭha hle.

Inkhel dangah sum hmang tam Atletico Madrid-in injury time-a Angel Correa hmangin Athletic Bilbao 1-0 in an hneh a, Man City aṭanga an lakluh Julian Alvarez-a'n goal a la khung lo.