Match 35 hnuah Leverkusen an tlawm

Bayer Leverkusen-in season liam ta khan hneh loh nei loin Bundesliga-ah an champion a, tun season-ah erawh Xabi Alonso hoten bul a ṭan ṭha tawk - Inrinni zan khan RB Leipzig lakah 3-2 in an tlawm. Leverkusen hian Bundesliga bikah match 35 chhung hneh loh an tawn loh hnuin an record duhawm tak chu Leizpig-in an thai chhiatsak.

BayArena-ah Leverkusen-in bul an ṭan ṭha a, Jeremie Frimpong-a'n minute 38-naah a tlan chakna a hmang ṭangkai a, box chhungah rilru fim pu lehin goal hmahruai a khung. Minute 45-naah Leverkusen-in passing game an khel a, Florian Wirtz-a'n mahni hma sial lo taka Alejandro Grimaldo pe lehin Spanish wing back hian goal hnihna a khung.

German champion dinhmun ṭha hman mah se first half injury time-ah Kevin Kampl-a'n a club hlui lamah siphurh a sut ṭhen a, mikhual team Leizpig-in beiseina thar an neih phah. Second half-ah Lois Openda show a hmuh tur a awm zui.

Kum 24 mi Openda hian minute 57-naah siphurh a sut zo a, Belgium international striker hian box pawn aṭangin minute 80-naah chakna goal a khung. Hun tawp lama siphurh sut thei tak Leverkusen pawh an tho zo ta bik lo.

Inkhel dangah Werder Bremen leh Borussia Dortmund te goal awm loin an inhnehtawk a, Dortmund defender Nico Schlotterbeck chu minute 73-naah hnawhchhuah a ni. Nizan khan Bayern Munich an inlan a, result kan hre hman lo.