Bournemouth comeback a ropui

Goodison Park-ah Season Dyche-a enkawl Everton-in minute 85 thleng chu tihsual an nei lo a, Bournemouth lakah 2-0 in hma an hruai. Mahse, hun a tawp meuh chuan Cherries 3-2 in an chak a, mualneitu Toffees an mualpho.

Inrinni zan inkhelah Everton-in Michael Keane leh Dominic Calvert-Lewin hmangin second half-ah goal hnih an khung a, stadium chhung boruak a ṭha a, Cherries keeper thar Kepa Arrizabalaga tan tih theih a awm lo.

Dyche-a hoten tun season Premier League-ah point an hmu ve ngei dawn niin lang hman mah se a tawpah Everton an tlusawp. Antoine Semenyo-a'n minute 87-naah siphurh a sut ṭhen a, injury time-ah Lewis Cook-a'n siphurh a sut zo.

Cherries-in chak beiseina an nei a, injury time minute ruknaah Luis Sinisterra-a'n chakna goal a tauh lut. Everton hi Premier League-a minute 87-na thleng goal hnih emaw a aia tama hma hruai a, chak lo hmasa ber an ni.

Everton boss Sean Dyche chuan, "Goal hmasa ber kan chhuah hma zawng kha chuan an ti dik a, goal an khung hmaah khan target-ah vawi khat chauh an pet ang. Kan tawnhriat ngaihtuah pawhin chak thei tur kan ni a, mahse vawiinah chuan kan thei si lo," tiin a sawi. Cherries hi table mawngphaha an awm mek a, an chung chiaha awm Southampton pawhin match thum khelhah point an la hmu bik lo.