Leeds defender hlui Bamba a thi

Leeds United defender hlui Sol Bamba chu kum 39 mi chauh niin August 31, Inrinni khan a hnathawhna hmun Manisa, Turkey-ah a thi.

Bamba hi France rama piang a ni a, PSG aṭanga inzir chhuak niin Leicester City, Leeds United, Cardiff City leh Middlesbrough tan a khel tawh. France ramah piang mah se a nu leh pa te pianna Ivory Coast tan a khel thung a, Elephants tan match 46 khelin goal khat a khung.

Ivory Coast international hlui Bamba hian kum 2021 khan thisen cancer a hneh a, Turkish club Adanaspor tan technical director hna a chelh. Inrinni khan Adanaspor leh Manisa FC te inkhelh laiin Bamba hi a damlo a, damdawi in panpui ni mah se an chhan hman ta lo.