New Zealand in semi-final an lut

ICC World Cup 2015-ah semi-final khel tur ahriat kim ta a, Inrinni khan World Cup thlengtu pakhat zawk New Zeland chuan run 143 a West Indies sawpin semi-final an lut ve leh ta. Black caps ho hma hian South Africa, India leh Australia te'n semi-final an lo lut tawh a ni.

WestpacTrust Stadium, Wellington-a inkhelah hian New Zealand tan Martin Guptill a che ropui a, kum 28-a upa batsman hian double century vawchhuakin a team a chakpui a ni.

Ṭhumvawra vannei zawk New Zealand in bat hmasak an thlang a, over 50-ah run 393 vawchhuakin mi paruk chiah an hloh a, West Indies tan chuan target huphurhawm tak a ni. New Zeland tan Martin Guptill-a che ṭha fal a, ball 163 a hmachhawnah run 237 vawchhuakin a tawp thleng a dam a, World Cup-a run siam hnem ber record a siam a ni.

Guptill hian Chris Gayle record run 215 chu a rawn khum. Chris Gayle hian kumin World Cup-ah tho group stage-a Zimbabwe an tum ṭumin World Cup run siam hnem ber record a lo siam tawh a, rei lo teah Guptill hian a rawn lehpel leh ta nghal a ni. Guptill hian run 237 vawchhuak turin six vawi 11 leh four vawi 24 a vawchhuak a ni.

ODI bik hrim hrimah erawh Indian Rohit Sharma aia run siam hnem an la awm lo a, ani hian kum 2014 khan Sri Lanka lakah run 264 a lo vawchhuak tawh a ni.

West Indies in an target an um na kawngah ball 33 a hmachhawna run 61 vawchhuaktu Chris Gayle che ṭha viau mahse, a ṭhian te'n an thlawp ṭhat tawk loh avangin an chak zo ta chuang lo a ni. West Indies hian run 250 vawchhuakin over 30.3-ah an vaiin an out vek a ni.

Khel ṭha em em mai Guptill chuan, "Vawiin thil thleng hian min ti lawm takzet a ni. Stadium chhunga mipui zawng zawng kha ka hming lamin an au rual dual dual a, khatiang kha ka thil la tawn ngai loh a nih avangin nuam ka ti takzet a ni," a ti.

New Zeland hian Thawhlehni zing dar 6:30 hian semi-final ah Sri Lanka sawptu South Africa an hmachhawn ang.