Zarkawt Serpents an chak ve ta

Zirtawpni tlai khan Zarkawt Serpents chuan Chaltlang Ryders 80-76 in an hneh a, Samsung 3:16 Plan Solution Mizoram Super League-ah a vawi khatna atan an chak.

Ryders leh Serpents hi MSL-ah vawi khat ve ve an chak tawh a, an point hmuh zat a intluk chiah avangin an pahnih inkara goal average ṭha zawk Ryders chu pangnaah an awm a, Serpents chu table mawngphahah an awm zel.

Chaltlang Ryders assistant coach Marc Lalthlamuana Sailo chuan, "Kan chak loh vangin team boruak a chhiat phah lo a, practice ṭha lo zilh nan a ṭha viau thung. Kan player-te'n team a khelh aiin mimal game an ngai pawimawh a, insiamṭhat kan ngai a ni," a ti.

Zarkawt manager Dino Laldinpuia Chhangte chuan, "MSL awm hma khan Pathian zarah table mawngphahah kan awm ngai lo, kan division khelh tawh naah champion te niin kan tluang ve zel a, 1st division league-ah khan pahnihna kan ni. A hnuai bera awm hi hreawm kan ti a, Ryders kan hnehna hian phurna min pe. Tunah hian bul ṭan tharah kan inngai a, kan hmabak inkhelah chak ngei kan tum a ni," tiin an phur thar thu a sawi.