Milan an chak, mahse fans an lungawi lo

Italian club AC Milan chuan a zawna match thum chakni hmel an hmuh loh hnuah Inrrinni zan khan an khingpui Cagliari chu Jeremy Menez-a goal hnih leh Philippe Mexes-a goal khat hmangin 3-1 in an hneh. Diego Farias chuan Cagliari goal awmchhun a khung ve bawk. He inkhelah hian an club president Silvio Berlusconi laka lungawi lo Milan fans ten an lungawi lohna stadium-ah an lan tir.

Milan hian Serie A match 27 khelh tawh aṭangin point 38 chauh la hmuin table-ah pasarihna an ni mek. Hmahruaitu Juventus nen an inthlauhna chu point 28 zet a tling tawh. Season thar a Champions League khel phak tur dinhmun a ding mek pathumna Lazio an phak lohna pawh point 11 lai a ni bawk.

Fans intelkhawm pawl 'The Curva Sud ultras group' chuan fan te chu inkhel en lo turin an ti hial tawh bakah an president chu langtlang zawka hma la ṭhin turin an ngen bawk.

Vawi 18 zet Serie A champion lo ni tawh leh Europe-ah pawh ṭum riat lai champion lo ni tawh an nih avangin an club dinhmun tawn mekah fans te an lungawi thei rih lo a ni.

Khelmual mi 80,000 zet len naah hian inkhel en turin fans 30748 chauh an kal khawm a, an thawl hle. Milan fans te chuan banner tarin 'Game Over' leh 'Insert coin & #SaveACMilan' tih chu lian takin an tar chhuak a ni.

He tih mek lai hian Filippo Inzaghi chuan chak result an neih avangin fans te chuan inkhel en an duh leh mai a beisei thu a sawi chhuak.

Milan manager Inzaghi chuan, "Tunah hian kan dinhmun a khirh rih hle, kan duh leh tum danin kan awm vek thei lo. Player ṭha tak tak kan neih avangin a eng lam kan thlir tlat tur a ni. Hun harsa ka tawn te hi ka nihna tak lan chhuah na hun tur a nih avangin ka theih tawp in ka bei zel ang," tiin a sawi.

Dutch midfielder Marco van Ginkel chuan, "Zaninah khan 'The Curva Sud' te hmuh tur an awm loh avangin an ngaihawm hle. An mi ṭawiawm na kan mamawhin kan ngai em em a ni, inkhel en tur a an lo kal leh theih nan theih tawp kan chhuah tur a ni" a ti.

Milan defender Luca Antonelli pawhin, "Season kan hman ṭhat loh vang a kan fans te lungawi loh na hi a awm ka ti. Mahse, kan hnen a lo kir leh turin ka duh a an lo kir theih nan theih tawp kan chhuah a ṭul, " tiin a sawi ve bawk.