Premier League-ah rinkaite an chak
Wilfried Bony-a'n Manchester City tana a goal hmasa ber a khung a, Arsenal forward Olivier Giroud-a'n goal khung chhunzawm zel in, Southampton-in Shane Long-a goal hmangin hnehna an chang bawk. Inrinni zan Premier League result in Champions League khelh inchuh boruak a ti ṭang ṭha hle.
Red Card pek sual
Etihad Stadium-ah inkhelh ṭan aṭanga minute hnihna lekah wing back Craig Dawson-a'n City forward Bony a ti tlu a, defender Gareth McAuley hnawhchhuah a ni daih. Referee Neil Swarbrick-a'n a tisual chiang hle.
Tam zawk City goal khung hun nghah chu inkhel thlirtute hmabak a ni. West Brom keeper Boaz Myhill-a'n goal khung hun ti khaw tlai mah se minute 27-naah ball per nalh taka la luttu Bony-a'n chiang zetin a khung a. City-in ball an chang tam a, Fernando leh David Silva te'n goal khat ve ve khung belhin 3-0 in an chak. Brazilian midfielder Fernando goal hi City -in Premier League-a goal 1000 an khungna chiah a ni.
West Brom manager Tony Pulis chuan, "Referee khan chhia leh ṭha hriatna pawhin a microphone hmang khan a official puite kha a zawt tur a ni a, thutlukna mak tak a ni. Referee thutlukna dik lo vanga chak lo kan ni," tiin inkhelh banah a lungawi loh thu a sawi.
Laipui a puak
St James Park-ah Arsenal-in bul an ṭan ṭha a, minute 24-naah Santi Cazorla freekick chu Giroud-a'n a tlawh lut a, French forward hian minute li hnuah corner aṭangin a a tauh lut leh a, tun season-ah goal 17 a khung tawh.
Second half ṭan aṭanga minute 3-ah Moussa Sissoko-a'n Newcastle tan goal a khung a, 2-1 a ni. Hemi hnu hian inkhel a dang a, Newcastle midfielder Remy Cabella a hmuhnawm a, keeper David Opsina chet ṭhat zarah Arsenal an him hram. Arsenal a zawnin vawi ruk an chak a, table-ah pathumna dinhmun an sawhnghet.
Newcastle boss John Carver chuan, "Kan result a ṭha tawk lo a ni thei. Amaherawhchu second half kan khel thlir tan chuan chak tumin kan khel tih a chiang a ni. Player-te an thawkrim a, hmasawn zel kan tum," tiin a sawi.
Second half-a an khelh chhiat chungchang zawhna chhangin Arsenal manager Arsene Wenger chuan, "Manchester-a kan inkhelh hnu lawkah West Ham leh Monaco kan hmachhawn leh a, kar hnih chhung lekin khualmualah vawi thum kan inkhel a, second half kan khelh ṭhat tawk loh chungchangah buaina tur ka nei lo," tiin a sawi.
French manager chuan sawi zelin, "A sang thei ang bera season zawh kan duh. Point 60 kan hmu tawh a, game riat khelh tur a la awm. Thla thum chhunga kan result thlir hian a lungawi thlak khawp mai. Chutihrualin kan match hma bakah chuan chak zel kan duh," a ti.
Inkhel dang
Southampton keeper Fraser Forster chu England squad-ah koh a ni a, amaherawhchu Inrinni zanah inhliam vanga zawnchhuah a ni. Saints erawh keeper inhliam vangin an buai lo a, Shane Long leh Jason Shackell own goal hmangin 2-0 in Burnley an hneh.
Swansea-in Villa Park-ah minute 87-naa Bafetimbi Gomis goal hmangin 1-0 in Aston Villa an hneh a. Britannia Stadium-ah Stoke City-in Mame Diouf hmangin hma hruai mah se Crystal Palace-in Glenn Murray leh Wilfried Zaha goal hmangin 2-1 in an lehthal a. West Ham-in minute 88-naa Diafra Sakho goal hmangin Upton Park-ah Sunderland 1-0 in an hneh a, Dutch manager Dick Advocaat-a'n Black Cats a enkawl hmasak ber ṭumin point a hlawhchhuak thei lo.
Team dinhmun
# Team Pld GD Pts
1 Chelsea 28 35 64
2 Manchester City 30 34 61
3 Arsenal 30 27 60
4 Manchester United 29 24 56
5 Liverpool 29 13 54
6 Southampton 30 21 53
7 Tottenham Hotspur 30 5 53