Spurs in Kane-a hat-trick an chakpui

Harry Kane chuan Premier League-a a hat-trick hmasa ber a siam a, Inrinni zan khan table mawngphah a awm Leicester City lakah goal thum khungin a team Tottenham Hotspurs chu 4-3 in hnehna a chanpui.

White Hart Lane-a inkhelah hian Kane hian minute 6 leh minute 13 naah te goal khungin, minute 64 naah a goal thumna chu penalty aṭangin a khung leh a ni. Tunhnaia England tana khel tura koh Kane hian tun season-ah goal 29 khung tawhin Premier League-ah goal 19 a khung tawh bawk.

Chak result leh Harry Kane vangin Tottenham lawm mah se, an lawm a kim lo. Goal-kee­per Hugo Lloris chu inkhel ṭan aṭanga rei lo teah a team-mate Kyle Walker nen an intawh sual avangin zawn chhuah a ni. A hliam nat dan hi hriatchian a la ni lo.

Tottenham manager Mauricio Pochettino chuan, "Kane-a hat-trick kha a ropui takzet a, game khata goal thum lai a khung thei hi ka lawmpui hle a ni. Leicester khan an rawn khel ṭha em em a, goal thum lai an rawn khung thei. Tunah chuan kan hmabak inkhel tur awm apianga ṭha tak a khelh chhoh zel chiah kan mamawh tawh a ni," a ti.