Khatla-in a ṭum hnih nan BCA an hneh

Mizorama basketball inelna sang ber Samsung 3:16 Plan Solution Mizoram Super League-ah Khatla TBL an sang ber, Zirtawpni zan khan an elpui Zarkawt BCA 78-67 in an hneh.

Hawla Indoor Stadium-ah inkhel boruak a sang a, game hmuhnawm aṭanga in nam deuh rap rap thlengin hmuh tur a awm a, entu tam ber ṭum a ni. Khatla TBL coach H. Laldinsanga'n point 30 a khung a, MSL-a point 12 an hmuh theihna kawngah sulsu tu a ni.

Inkhel tur Vanglaini-in a thlirlawk ṭumin BCA assistant coach Lalruatfela'n TBL guard Mapuia chu player ṭha tak ni mah se a khelh tam loh avangin an hlauhthawn loh thu a sawi.

Amaherawhchu TBL game plan-ah Mapuia'n amah a in telh a, home team tana khel tur player-te inhmelhriattirnaa hming lam hmasak ber chu H. Lal­dinsanga ni. Khatla ṭantute an sahawk nasa nghal hle.

Ngam leh ngam inkhelah TBL an pawngpawrh hret a, hun rei lote chhungin Khatla hian 12-6 in hma an hruai nghal. BCA-in guard tawnhriat nei ṭha Michael F. Lalawmpuia an luh tir a, point score nghal mah se a luh rual chiaha lut TBL captain Vanlalnunsanga'n a lut ve nghal bawk. First quarter zawhah TBL-in 18-13 in hma an hruai.

Second quarter tawp lamah Michael hoin BCA-in TBL an umpha teuh viau a, point dinhmun chu 33-34 niin an inthlauhna chu point khat chauh a ni. Mahse, Khatla tan Vanlalmuana'n nalh taka Zarkawt tlar hnung patlangin point hlu tak a khung a, halftime ni zuiin 36-33 a ni.

Third quarter-ah TBL an che ṭha nghal a, an fal hmain BCA tan Henry Lalramngaihawma leh Dennis Lalmuanpuia te'n three points an lut ve ve a, 49-48 a ni. TBL dinhmun a derthawng lai takin Mapuia bawk rawn langin hmun him zawkah a team chu a dah a, BCA forward David Lalruatfela'n a theihna a lantir ve bawk avangin fourth quarter khelh hmaa point dinhmun chu 54-50 a ni.

Quarter tawpnaah tha­rum a tam lehzual a, BCA forward Dave leh TBL forward R. Lalmalsawma te'n bul an ṭan a, boruak lum phatah Dave-a'n a game a hloh a, BCA lam an ṭang ulh a ni ber. TBL guard Mapuia'n tawnhriat a hmang ṭangkai a, Nelson Lalrohlua leh Gospel Lalthawmmawia te an pawimawh zel avangin point-ah team pahnih an inthlau tial tial.

Boruak erawh a dai mai lo; TBL guard Vanlalmuana leh BCA forward Jackson Lalrintluanga te ṭhelh ngaiin an che leh a, TBL guard Mala'n ball-in a khingpuite a vawm lui a, mak takin referee te'n an hmu lo. Thiamna aia tharum an uarh laiin Mapuia erawh a cool reng a, sial tak tak a luh avangin a tawpah TBL 78-67 in an chak.

League match bika TBL leh BCA boruak chu a tawp a, amaherawhchu final-a an intawng leh a nih ngat chuan boruak a nung thar leh khawp ang. Chumi hunah chuan BCA an dam kim tawh ang.

Eng nge an sawi?

Zarkawt BCA assistant coach Lalruatfela chuan, "Mapuia'n point 30 a nei a, a khelh ṭhat kha TBL chakna chhan chu a ni. Kan teamin ṭum dang kan pha lo a, kan khel chhe bawk nen TBL kha kan tluk ngang lo a ni," tiin inkhel chungchang a sawi.

Afela chuan hmabak sawiin, "Kan chak lohna lai kan hmu zel a, kan insiamṭha zel dawn. Club ṭha ber TBL kan khel zo tawh a, kan player-te an dam kim anga, kan chak chhoh zel kan beisei. Mipui ṭawiawmna ṭha vangin kan lawm a, mipui puihna nen final kan thlen ngei ka ring," a ti.

Khatla TBL guard H. Laldinsanga chuan, "Chak loh hi ka duh ngai lo. Practice-na a ni emaw half court-in kan khel emaw inelna eng pawh ni se chak loh ka duh lo. Mawhphurhna ka koah a tla fo tawh a, ka tlan chhe ngai lo. Kan chakna kha mimal hnathawh a ni lo a, team hnathawh a ni," tiin Vanglaini palaiin amah vanga chak anga TBL a ngaih chu a dik lo tih a sawi.

Mapuia chuan team chungchang sawiin, "Chhiar­kawp dana a chian hma chuan final kan lut chiangah ka ngai lo. Mipui aṭanga kan ṭawiawmna hmuh hi a ṭha thlawt a. Team dang nen ka inkhaikhin lo a, kan team ṭhatnaa ka hmuh chu kan discipline ṭha hi a ni," a ti.