Wimbledon 2016 a herliam ta

Tennis tih sawi ruala rilrua lo lang hmasa ṭhin, mipui en chak, player-ten hlawhtin an chakna hmun leh khawvelin a ngaihsan ni bawk tennis tournament upa ber Wimbledon chu kumin bik a tan khelh zawh a lo ni leh ta - ṭhenkhat tan lawmna mittui a luan laiin player ṭhenkhat tan erawh hriat reng chakawm loh leh theihnghilh theih tawh ngai loh tur a ni thung.

All England Lawn Tennis Club leh International Tennis Federation te ṭangkawpin an buatsaih 2016 Wimbledon Championship hi June 27 aṭanga July 10, 2016 chhung khan All England Lawn Tennis leh Croquet Club Wimbledon, London, United Kingdom-ah khelh a ni a - Centre Court chu inelna hmunpui ber niin ruah a sur palh pawhin a chung khuhna a awm.

Kumin hi Wimbledon vawi 130 an khelhna chiah niin Open Era bikah chuan a ṭum 49-na a ni thung. Grass court-a khelh ṭhin niin ATP World Tour leh WTA Tour calendar-ah Grand Slam category-ah dah a ni. Champion hian ranking-ah point 2,000 an hmu ṭhin. Inelna hi mipa leh hmei-chhiaah ṭhen hran niin (single, double leh mixed double) kum bithliah tan a hranpa a siam a ni bawk. Kuminah hian a vawi khat nan mipa leh hmeichhe wheelchair player tan single inelna telh a ni bawk.

Thlengtu an lawm

Khawtual tlangval Marcus Willis-a'n bul a rawn ṭan a, a tawp khartu pawh tualchhung tlangval tho Andy Murray a ni. Inelna ṭan hmaa world number 772 Willis hian Wimbledon khel turin qualifying match ruk ngawt a paltlang a, beisei loh takin first round-ah ATP ranking-a 54-na Ricardas Berankis a hneh - second round-ah Federer hneh lo mah se Willis chanchin hi titi pakhat a tling.

British mipui ten tennis an ngaina a, he infiamna hi an inti-tatu hle bawk. Mahse, kum 77 chhung zet chu an mahni milehsa zingah Wimbledon champion thei an awm lo a, he chanchin duhawm lo tak hi kum 2013 khan Murray-a'n a ti tawp, hemi hnua lawmna tur dang an neih leh hmasak ber chu tun ṭuma Murray bawk a champion leh hi a ni.

Williams unau

Thiam zawng, theihna lam leh zir bik nei mihring kan ni a, Williams unau chu tennis khel tura piang an ni. Serena Williams hi Angelique Kerber hnehin a vawi sarih nan Wimbledon champion a ni a, Centre Court-a single champion a nih hnu lawkah a u Venus Williams nen double-ah an champion zui leh bawk - Venus hian tennis a khelh hun chhungin major title pasarih la tawhin Wimbledon-ah hian vawi nga a champion ve tawh bawk.

American star Serena hian Steffi Graf-i'n kum 1999 a record a lo siam tawh nih rualin Grand Slam-ah vawi 22 a champion ta a, Open Era-ah anni pahnih aia record nei ṭha an awm lo. Kum 34-a upa Serena hi a khelh dan thlirin nomawi dang chawi belh thei tur dinhmunah a la ding a, record thar kan hmu ngeiin a rinawm.

An tan a na...

Champion lai leh Grand Slam title kawl khawm vektu Novak Djokovic-a'n beisei a phak lo a, third round-ah Sam Querrey hneh loin a tla. World number 1 hian seaon khat chhunga major tournament palia champion kim vek thei ni tur chuan a bul aṭanga ṭan ṭhat a ngai leh rih dawn.

Grand Slam vawi 17 cham-pion tawh Federer hi kum 34-a upa ni tawh mah se player hlauhawm berte zinga mi a la ni reng. Kuminah hian Rafael Nadal chu ban rek na vanga a inlan loh bakah Djokovic leh seeded palina Stan Wawrinka te an tlak hma avangin Swiss thiampuipa tan hian champion-na kawng a inhawng zuia ngaih a ni.

Amaherawhchu, Federer hian ni thum chhungin quar-terfinal leh semifinal a kheh a ngai a, heng match pahnihahte hian set ngana thlenga khelh a ngaih bawk si avangin a tawp lamah a tha a ṭhum tawh tih a lang. Wimbledon 2012 a champion hnua major tournament-a a la champion leh lo hi a hun a liam ve tawh tihna a ni thei em? tih hi zawhna a ni.

Coach fing pahnih

Murray-a'n kum 2012
aṭanga 2014 inkara Wimbledon leh US Open bakah Olympic-ah te a champion theih nana mi pawimawh chu coach Ivan Lendl a ni. Grand Slam vawi riat champion tawh Lendl leh Murray te hi kumin June thla aṭang khan an thawk dun leh ṭan a - Wimbledon ṭan hma hian Queen's Club-ah hlawhtling nghalin nomawi lian dangin a zui chhunzawm bawk.

Mi pawimawh hmuh hmaih thiang lo chu John McEnroe a ni. Germany coach hian Wimbledon atan bik hian Milos Raonic a team a zawm a, a kaihhruaina hnuaiah Candian tlangval hian service leh a bik takin backhand-ah hma a sawn em em - semifinal-ah Roger Federer hnehin nomawi chawi zui thei chiah lo mah se Raonic thlensan chhanah McEnroe thluak a tel tih a chiang.

Wild cards

Wild-card hi Wimbledon chauh ni loin inelna hrang hrangah hman a ni ṭhin. All England Club bikah hi chuan kum 1977 aṭang khan hman ṭan a ni a, kuminah khan mipa leh hmeichhe single player paruk ve ve hnenah pek an ni.

Player ngaihven hlawh leh thleng sang thei tura beisei, a bik takin he inelnaa hnuhma lo nei ṭha tawh leh British mipuite ngaihven bik - an ranking a hniam vanga direct a inlan thei si lo te hnenah Wild card hi pek ṭhin a ni. Kum 2001 khan Goran Ivanisevic chu wild-card hmanga inlanin a champion zui a, ani chauh hi hetiang dinhmuna la ding thei a ni nghe nghe.