Chelsea-ah Willian a nghet

Coach thar Antonio Conte hnuaia khel tur Chelsea chuan an midfielder Willian chu kum hnih contract la nei mah se season li chhung an hnena cham belh turin contract thar an ziahpui.

Brazil tan vawi 30 in-lana goal ruk khung thei midfielder hian kum 2013 khan Russian club Anzhi Makhachkala aṭangin Chelsea hi pound maktaduai 30-in a zawm a, Blues tan match 140-a inlan tawhah goal 19 a khung sak.

Season hman zawh taka Blues tan vawi 59 inlana goal 13 khungtu midfielder chuan, "Chelsea tana ka khel chhunzawm thei tur hi ka tan chuan duhthusam a ni a, kum li dang lo awm turah nomawi tam zawk kan chawi theih nan theihtawp ka chhuah ang," a ti.

Chelsea hian season hman zawh taka an 'player of the season' contract thar an ziahpui hma hian striker Michy Batshuayi chu Marseille aṭangin an lalut tawh a, Belgium international man zatah hian pound maktaduai 33 an inseng a ni.