Rafa Benitez-a'n Sissoko chelh a duh

Newcastle manager Rafa Benitez chuan Euro 2016 star Moussa Sissoko chu season leha Premier League lama an let ngei theih nan chelh a duh a, hetihlai hian France international erawhin Championship lama inlan a chak lo niin a lang.

Kum 26-a upa midfielder hi Euro-ah khan a khel ṭha hle a, final-ah Portugal hneh lo mah se Manchester United, Arsenal leh Borussia Dortmund te chuan an ngaihven hle nia sawi a ni. Mahse, Magpies chuan an player hi chelh an duh avangin a manah pound maktaduai 33.35 an chhiar.

Real Madrid manager hlui Benitez chuan, "France an chak loh avangin pawi ka ti. Chutih rualin Sissoko a khelh ṭhat em avangin ka lawm a, ani hi player ṭha tak a nih avangin kan club-ah awm zel se ka duh. Mite hian a man zat an sawi fo a, keini lam chuan hralh kan duh loin a man zat pawh kan chhiar lo," a ti.

Hetihlai hian Sissoko aiawh chuan, "New-castle hi ka hrethiam thei lo, season hmasa khan Moussa hi kum khat dang a cham leh ang, kan ti a. A theih tawp a chhuah bawk. Pound maktaduai 15.01 aṭanga 28.05 chinah chuan a chhuak thei ang ti pawhin an sawi fo. Tunah hian min biak duh club ṭhenkhat an awm a, tluang taka indawrna kan neih theih ngei ka beisei," a ti.