England manager turin 'Big Sam' a lian tawk

Sunderland chuan an manager Sam Allardyce ngenna angin English FA chu an boss hi biak an phalsak thu nimin khan an puang - 'Big Sam' tia hminglem an pek manager hi nimin khan FA vice-chairman David Gill ina a leng hmuh a ni bawk a, Black Cats manager hian England boss dinhmun a chelh a nih pawhin thil mak a ni tawh lo ang.

Kum 61-a upa manager hian Sun­derland chu pre-season tour neiin Austria-ah a zinpui a, tun kar tir khan Aus­tria aṭang hian a haw. English manager hi transfer chungchang buaipui tur a awm vanga England lama kir anga sawi ni mah se Sunderland berin FA nen an indawr thu an puan tak avangin England manager hna chungchang vanga haw ni ngeia ngaih a ni.

Sunderland chuan, "Football Asso­cia­tion chuan kan manager hi dawr an duh avangin biak phalna an rawn dil a, kan manager Sam chuan he dilna hi lo phalsak tura min ngen avangin a dilna hi kan pawmsak a ni," tiin an manager chu FA nen indawr tura phalna an pek thu an puang.

Black Cats chuan Premier League season hman zawh taka inhamtanpuitu manager chu a theih hram chuan chelh an duh thu sawiin, "Sam hi kan ruahmanna engkimah kan la telh vek a, season phurawm tak leh duhawm tak kan hman zawh chiah avangin kan hnena cham zel turin kan duh a ni," tiin an manager chu chelh an duh.

England-in Euro 2016-a beisei an phak loh avanga manager Roy Hodgson a ban hnuah Liverpool boss hlui hmunruak luah tur hi an inrinsiak nasa hle a, a tir aṭangin Sam hi hming langsar pawl niin Sir Alex Ferguson meuh pawhin Newcastle United manager pawh lo ni tawh hi England coach ni tura ṭha ber a nih thu a lo sawi tawh.

Khawthlang media-te chuan FA-in Sam Allardyce an dawr chhanah hian Manchester United boss hlui Sir Alex hi a inrawlh thuk hle niin an sawi a, a awm lo hran lo - FA vice chairman leh England coach ruattu tur panel member zinga mi David Gill hi Manchester United chief executive lo ni tawh a ni a, Sir Alex nen hun rei tak an lo thawhdun tawh avangin Scottish manager thurawn hi a ngai thutak hlein a rinawm.

England manager thar ruat tur hian Football Association chuan member pathum awmna panel a din a, David Gill bakah hian FA technical boss Dan Ashworth leh chief executive Martin Glenn-te chu member niin anni pathum thutluknaah hian England kaihruai tur chu a innghat ang.