Champions League qualifying Rodgers-a hnuaiah Celtic an mualpho nghal

Liverpool manager hlui Brendan Rodgers-a'n Celtic-a zawm hnua a competitive match hmasa ber a hmachhawn a, tih mualphoin a awm nghal - Thawhlehni zan khan Champions League second qualifying round-ah Celtic hian semi-professional club Lincoln Red Imps an lenchilh a, Gibraltarian club hmaah hian 1-0 in an mualpho.

Minute 48-naah inkhela goal awmchhun kan hmu a, Lincoln Red Imps tana goal khungtu hi Gibraltar sorkar hnuaia Ministry of Defence police officer Lee Casciaro-a ni!

Celtic tan Scotland internatio-nal Leigh Griffiths chuan vawi hnih lai hun ṭha nei mah se goal bar bak a pet per thei lo. Karleh Nilaini khian team pahnih hi second leg-ah an inhmachhawn leh dawn a, Celtic tan chak loh a thiang tawh lo ang.

Inkhel chu

Lincoln Red Imps-in an hmachhawn tur team an hrechiang a, inkhel ṭan tir aṭanga an tlarhnung ngaipawimawh nghalin an innghahna chu counter attack a ni.

Rin loh zawk Girbraltar team hian chance an nei hmasa zawk a, mah se Liam Walker-a goal shot chu Celtic keeper Craig Gordon tan dan harsa a ni lo. Scottish club tan forward Moussa Dembele-a'n a hnu lawkah goal khung mah se Red Imps keeper Raul Navas laka a foul avangin a goal khung hi pawmsak a ni lo.

Second half ṭan a ni a, beisei loh takin Imps lamin goal an khung. March 2015-a UEFA member an nih hnua Gibraltar goal hmasa ber Scotland lama khungtu Casciaro chuan Celtic defender Efe Ambrose a tlan hel hnuah Scottish club lamah a khung.

Celtic lamin chak ngei tumin nawr mah se goal hmaah an hlauh-awm tawk lo a, inkhelh hmaa European football chan-china in barakhaihna lian ber pawl an thlentir tur thu sawitu Imps captain leh customs officer ni bawk Roy Chipolina-a thusawi dikna a thleng a, Celtic an mualpho.

Mualphona thlentu

Scotland football chanchinah Celtic aia club ropui sawi tur an awm bik lo - Scottish league-ah vawi 47 lai an champion tawh bakah European Cup nomawi pawh vawi khat an lo chawi tawh a, Europe khawmualpuiah pawh club langsar pawl an ni ṭhin.

Beiseina sang tak nen Liver-pool manager hlui Brendan Rodgers an ruai a, Premier League-a Chelsea, Manchester United, Manchester City leh Arsenal te lo inkhinpui tawh ṭhin manager hian a competitive match hmasa berah a mualpho pui nghal.

Lincoln Red Imps-a player-te hi Celtic player rual anga eizawnnana football hmang an ni lo a, an hunawla inkhel ve ṭhin chauh an ni zawk! Gibraltarian club player zingah hian fire department lama hnathawk, taxi driver, police-te an kat nawk a, kum khata pound maktaduai chuang hlawh thei player hmaah an zam bik lo.

Rodgers-a'n Lincoln Red Imps nen an inhmachhawn hma-in European competition-a Celtic a kaihhruai theih avanga a inchhuan thu sawi mah se inkhel a zawh meuh chuan a inchhuanna tur a nei tawh lo a, a coaching career-ah a chhe zawnga a hriat reng tawh tur thil a tawng.

Tute nge Imps?

Spain ram ṭhenawmah Gibraltar an awm a, kum 2015 chhiarpuia a lan danin an ram mipui zat chu 32,194 chauh a ni! May, 2013 khan Europe-a football thuneitu sang ber UEFA member nihna an nei ve chauh a, May, 13, 2016 khan FIFA member an ni ve ṭan chiah.

Gibraltar Football Association (GFA) enkawlna hnuaiah Gibraltar Premier Division an nei a, an ram football-a club inelna sang ber hian professional league dinhmun a la luah pha lo. Team pariat awmin, season tina champion hian Champions League first qualifying round an khel ṭhin a, Rock Cup (an FA Cup ve) champion chuan Europa League playoff an khel ṭhin bawk.

Lincoln Red Imps hi Gibraltar Premier Division-a champion ngun ber an ni a, vawi 22 lai league nomawi an chawi tawh. Uruguay international hlui Julio Cesar Ribas chu an coach a ni a, a vanglaia Uruguayan club lar Nacional midfielder ṭhin hian Imps a enkawl hma hian Uruguay club Penarol bakah Oman national team-te a lo enkawl tawh.

2014-15 season khan Cham-pions League qualifying-a an match hmasa ber an khel a, Faroe Islands club Havnar Boltfelag lakah inkhel pahnih belhkhawmah 6-3 a an tlawm avangin first round an paltlang zo lo.

Kum 2015-16 khan Cham-pions League first round quali-fying an khel leh a, Andorra club Santa Coloma chu 2-1 a hnehin first round an paltlang. Second round-a an hmachhawn erawh Danish club FC Midtjylland niin 3-0 in an tlawm.

Tun season hi Red Imps tan Champions League qualifying an khelh vawi thumna a ni a, first round-ah Estonian club FC Flora 3-2 a an hneh tawh avanga Celtic hi hmachhawn thei an ni - an club leh ram chanchina a vawi khat nan second round paltlang ngei an tum ang.