Everton-in coach hlui Kendall an chawimawi

Premier League club Everton chuan an club chanchina manager hlawhtling ber ang hiala chhal ngam Howard Kendall chawimawi nan an stadium-a stand pakhat chu a hming an thlak a, Kendall rual hian club chairman ṭhin Sir Philip Carter hming chawiin stand dang chu thlak a ni bawk.

Merseyside club hian Goodi-son Park-a Gwladys Street End ni ṭhin chu Howard Kendall Gwladys Street End tiin a hming an vuah a, Park Stand chu Sir Philip Carter Park Stand tiin an thlak bawk. Everton Chairman Bill Kenwright chuan an mi ropui pahnih chu "Evertonian ni tawh zinga ropui ber an ni" tiin chawimawina an pek chhan a sawifiah.

October 2015-a thi tawh Kendall hi Everton manager ni tawh zinga hlawhtling ber ang hiala ngaih a ni a, player a nih laia league-a Everton champion puitu hian coach a nih hnuah 1984–85 leh 1986–87 season-ah khan a zawnin league nomawi a chawipui a, FA Cup (1) FA Charity Shield (1) leh European Cup Winners' Cup (1) nomawi a chawipui bawk.