Joachim Low-a'n hna chhunzawm dawn

Euro 2016-ah hlawhtling zo lo mah se Germany coach Joachim Low chuan a hna a thawh chhunzawm zel dawn a, 2018 Russia World Cup-ah an ram hi a la kaihruai dawn.

Kum 56-a upa Low hian semifinal-a France an hneh loh hnuah Germany manager nih chhunzawm zel duh mah se German Football Association (DFB) nen inbiakna an neih tur thu a sawi - Thawhlehni khan DFB chuan world champion an nihna humhim turin an manager chungah rinna an la nghat ngam tih an sawi.

Low hian Jurgen Klinsmann thlakin 2006 aṭangin an ram team hi a enkawl ṭan a, 2008 Euro-ah final lut mah se Spain an hneh lo. 2014 World Cup-ah Argentina hnehin an champion a - tun ṭumah khan goal chhuah miah loin group stage paltlang mah se semifinal-ah a thlengtu France chu 2-0 in an hneh lo.

Beisei an neih thu sawiin Low chuan, "Tournament zawh chiah hi inngaihtuahna hun ṭha chu a ni. Kan chak loh avangin kan rilru a na a, mahse kan hnual lo - a chhan chu naupang theihna nei sang tak tak kan neih tam vang a ni," a ti.

DFB president Reinhard Grin-del pawhin Low dinhmun sawi chhuakin, "Ani hi kan team enkawl tura mi ṭha ber chu a ni. Hlawhtlinna chang leh turin a chungah rinna kan nghat ngam a, harsatna nei loin world champion kan nihna hi kan humhim theih ngei kan beisei," a ti.