Arsenal leh Higuain an inhnim hnai

Champion pui tham striker zawng tan chuan Serie A golden boot kawltu Gonzalo Higuain hi chhanna a ni thei ang. Napoli striker hi khawthlang media-te chuan Arsenal nen an sawi zawm a, London club-in sum an thehchhuah huai phawt chuan Argentine striker hi an chang ngei dawn niin a lang.

Argentina international Higuain hi awlsam taka lak theih erawh a ni lo a, Gunners hian an lalut dawn a nih chuan euro maktaduai 94 tal Italian club hnenah an pek a ṭul dawn. Kawng dang awm leh chu euro maktaduai 50 bakah Olivier Giroud pek telin Napoli lamin Higuain chhuah an pawi ti lo niin sawi a awm bawk.

Kum 28-a upa Higuain aiawhte leh Arsenal lam hian inbiakna an nei dawn nia sawi a ni a, tunah hian mumal taka inbiakna erawh a la awm lo. Napoli tana kum hnih daih contract la nei player chungchangah BBC chuan, "Inbiakna neih hnuah pound 94,376,000 a lei chhuah theih a ni a, hetiang a nih loh chuan a contract neih lai a hmang zo ang," tiin an thu dawn an ziak.

Hetihlai hian Giroud-a agent Michael Manuello chuan, "Olivier hi Arsenal player ni lai a ni a, tun thleng hi chuan inbiakna a la awm lo. Club lamin chhuak tura an duh a nih chuan a kal mai ang. Napoli hi khawpui nuam tak a nih avangin lungngaihna tur a awm lo a, hun nuam tak hman theihna tur a ni," tiin a sawi.

Arsene Wenger hian Real Madrid aṭangin Higuain hi lak-chhuah a lo tum tawh a, mah se Liverpool striker Luis Suarez lama rilru a sen tam hret avangin striker pahnih hi a chân ve ve.

Arsenal hian tun nipui chhung-in midfielder Granit Xhaka leh forward Takuma Asano an lalut tawh a, sum hmang hreh French manager hi a player thar pahnihah hian a lungawi tawk leh mai dawn nge a tih ṭhin lo dan deuhin sum tam tham a theh chhuak ve tawh dawn tih chu hunin a la hril ang.

Gunners tan Japan tana goal khat khung tawh Asano hi champion pui tham striker a ni lo a, Leicester City champion puitu Jamie Vardy an lak theih loh hnuah Wenger hian striker ṭha a melh zel. Euro 2016-a striker hriam ber zinga mi Giroud hi Arsenal neih sa a ni a, tun dinhmuna a lan dan chuan Gunners boss hian French striker chungah rinna a nghat ngam tawh lo niin a lang.

Khawvela player manto ber chu Gareth Bale niin Tottenham
aṭanga Wales international la chhuak tur hian Real Madrid-in pound maktaduai 85 an hmang. Hemi hma hian Manchester United aṭangin Spanish club tho hian pound maktaduai 80-in Cristiano Ronaldo an lo la lut tawh bawk. Lon-don club hian Argentina forward Higuain an duh tak tak a nih chuan uchuak taka sum an theh-chhuah ngam a ṭul tawh ve dawn a ni.