Lionel Messi boruak a reh thei lo

Barcelona chhuahsan dilna lehkha a thehluh hnu lawkah 'Covid' tih thumal chu luahlanin google lama hming zawn hlawh ber chu Lionel Messi a ni nghal a, Argentine forward thawm natzia hi hrilhfiah nawn kan ngai lo. 

August 25 zan khan Messi hian Barcelona chhuahsan dilna chu club board hnenah a thehlut a, Catalan club hian a zan lai lain committee nei nghal mah se he thu buatsaih thleng hian official taka thu chhuah an la nei lo thung. 

Messi lei thei tura an sawi zingah Manchester City chu a langsar ber an ni rih a, Manchester United hming pawh a ri ring pawlah a tel. Chutihrual chuan Paris St-Germain leh Juventus pawh sawi rik an ni. 

Argentine forward nena sawizawm te thlirin a thawm a la lian takzet tih phat rual a ni lo a, kumin transfer bazar hi Messi vang ringawt pawhin a ngaihnawm dawn chauh.

City boss Pep Guardiola-a'n Messi a fak tawhna ṭawngkam zawng zawng hai chhuak dawn ila ziah sen a ni lo ang a, chutiang bawkin Messi-a'n Pep-a fakna zawng zawng hi tarlan sen a ni lo. 

Football khawvela mi ropui pahnih hi an inngaina tawn tih phat rual a ni lo a, Messi-a'n Barca-a chhuahsan duh thu a sawi rualin Argentine forward nena an sawizawm hmasa ber chu City an ni. 

A chhan pakhat a awm - Pep nena an inngainatna piahlamah City hi Messi hlawh pe thei tur khawpa club hausa tlem te zinga mi an ni a, kum khata euro maktaduai 50 bawr vel hlawhtu forward hlawh hi European club ṭha pangngai tak dinna tham a tling. 

Hei mai a ni lo. Messi hi City legend Sergio Aguero ṭhian ṭha a ni a, Messi hian a hnampuipa a lo awm sa bawk avangin City zawm hi a hreh lo niin an sawi - Catalan club forward hian a fate British school-a a kaltir tawh thu thlengin an sawi!

Kar hmasa khan Messi leh Pep hi darkar thum zet phone hmangin an inbia nia sawi a ni a, inngaizawng tan pawh an inbiak chhung hi a rei lam chu a ni - engemaw tak an sawi tih chu a chiang. 

Pep hi Barcelona khawpuiah hmuh zui a ni a, khawthlang media-te chuan Messi lakluh theih dan tur ngaihtuahin Spain-ah hian a haw niin an sawi. City hian Messi hi kar khata pound maktaduai 1.4 hlawhtir an inhuam. 

Hriat tel tur chu Pep hi Spain aṭanga England-a a kir hunah kar hnih a inkhunghran a ngai dawn a, September 21-a Wolverhampton Wanderers nena an league match hmasa ber khel tur City tan pawimawh tawpah lo chuan an coach hi zinchhuah tir chi a ni lo. Argentine chanchinbu lar La Nacion chuan Messi hian a ṭhian hnai zual te hnenah chuan City a pan tur thu a hrilh tawh niin an sawi a, "City-a an football khelh dan hi ka ngaina a ni," a ti!

Messi hian a contract-ah season tawp apianga a thlawna chhuah theihna dan a nei a, hei hi hman ṭangkai a tum laiin Barcelona erawh chuan June 10 khan a thlawna a chhuah theihna dan hi a tawp niin an sawi thung. 

Barca hian engti hawi zawng pawha Messi chhuahtir loh hi an tum bur a, a release clause euro maktaduai 700-a lei ngam an awm chuan an tan chhuahtir loh ngawt theih erawh a ni lo. Chutihrual chuan Messi hlawh zat kan sawi tawh a, a hlawh piah lama kum 33 mi lakluh nana euro maktaduai 700 sen hi a thiamna leh theihna sang viau mah se thil âtthlak tak a ni ang. 

Chutiang boruak karah chuan City hian player pe tel chunga Messi lei pawh hi an pawiti lo nia sawi a awm a, mahse pek tel tura sawi langsar Bernardo Silva, Riyad Mahrez leh Gabriel Jesus chu City hian an chhuah loh tur thu an sawi tawh - Barca hian City defender pahnih Angelino leh Eric Garcia lakluh an tum tih erawh hriat tel a ṭha. 

Pound maktaduai 200-a Neymar lei ngamtu kha an ni a, Messi chungchanga Paris St-Germain hming a lo lang hi thil mak a ni hran lo. French club hian City ang thoa an thlakhlelh em em Champions League nomawi an chawi theih nan Messi lakluh hi an duh. 

Champions League final-a Bayern Munich an ngam loh hnu lawkah PSG boss Thomas Tuchel-a'n Messi an beisei loh thu sawi mah se Argentine forward-in chhuah dilna a thehluh kha Tuchel-a thusawi hnu a ni tawh. 

PSG hian Messi-a pa Jorge Messi chu inbiakna an neihpui tawh a, Jorge-a ngaihdan hian Messi hma hun thui takin a hril ang - ani hian a fapa tan agent hna a thawk nghal a ni. French club hian Messi thlem luh nan sum mai niloin inṭhianṭhatna chu an tawktarh tel a, Messi ṭhianṭha Neymar leh Angel di Maria sawi rik an ni. Hetihrual hian PSG hian Messi nen inmil lo nia an sawi Mauro Icardi pawh an kawl tel tho. 

Messi nena sawizawm langsar dang chu Juventus an ni - han ngaihtuah teh, Juve hian Messi nei ta se Cristiano Ronaldo nen team khatah an awm dawn tihna a ni a, football ngainatu tawh phawt chuan hei hi hmuh an châk ang. 

Chutihrual chuan Spanish football expert Guillem Balague chuan, "Thil hmuh châkawm tak a ni a, mahse Ronaldo leh Messi khelh dun hi chu thil theih loh ang deuhthawah ka ngai," tiin a sawi. Messi hi a thlawnin lo chhuak thei ta tehreng pawh ni se club pakhat tana Ronaldo leh Messi enkawl kawp hi thil hautak a tling ang - an pahnih hlawh ringawt pawh lu haina tham a tling dawn. Chu mai a ni lo. Player pahnih hian an kalnaah chuan hmun pawimawh changtu ni satliah loin a thu ber nih zel an duh a, chu chu an thiamna hmanga an hlawhchhuah a ni - player pahnih kawl hi ṭhatpui aiin chhiatpui a awl zawk mai thei. 

Barcelona coach thar Ronaldo Koeman chuan nimin khan player-te chu Covid-19 an kai leh kai loh enfiah turin a ti a, nimina test nei zingah hian Messi a inlan lo!

Neymar-a'n PSG-a pan tur thu lo puang tawhtu, journalist rintlak Marcelo Bechler chuan nimin khan Messi hian test a hmachhawn loh thu a sawi a, "Barca player-ah a inngaih tawh loh vang a ni," a ti. 

Messi-a'n test a hmachhawn loh avangin vawiina club training chu a zawm dawn lo chiang tihna a ni. Hetihlai hian Barcelona chuan rei tak an lo thawhpui tawh law firm Cuatrecasas chu an thawhpuina an titawp bawk.

Khawthlang media-ten an tarlan dan chuan Cuatrecasas hi Messi 'ukil' te ve tho an ni a, anni hian Messi hi a free-a a chhuah theihna dan hi an lo hrilh nia sawi a ni - a la ngaihnawm dawn chauh e!